Kembridž

Kembridž
Cambridge
Lidnanznam;	Flag;
Valdkund	Sur' Britanii
Eläjiden lugu (2024)	149,352 ristitud
Pind	40,7 km²
Telefonkod	+44−12
Aigvö	tal'vel UTC+0,; kezal UTC+1

Kembridž (angl.: Cambridge [ˈkeɪmbrɪdʒ] «sild Kemas päliči») om Suren Britanijan lidn Anglijan päivnouzmas. Se om Kembridž-grafkundan administrativine keskuz, om sen erigoittud rajonaks «siti»-statusanke.

Istorii

Eländpunktan aluz om pandud 1. voz'sadal meiden erad. Se mainitase ezmäižen kerdan vl 730. Mail'man tetab Kembridžan universitet om olmas lidnas vspäi 1209.

Kembridž šingotase tedoidusil, inžiniringal, zell'edheotandoil i turizmal.

Geografijan andmused

Lidn sijadase grafkundan suvipalas, Kem-jogen alangištos (angl.: River Cam 70 km pitte, Greit-Uzan oiged ližajogi), 6..24 m ü.m.t. korktusil.

Matkad Londonhasai om seičemekümne kilometrad suvhe, Börmingemhasai — 153 km päivlaskmha. Lidn om ümbärtud grafkundan Saut-Kembridžšir-rajonal kaikiš polišpäi.

Klimat om ven valdmeren pil'vekaz. Voden keskmäine lämuz om +10,8 C°, heinkun-elokun +17,7..+17,9 C°, tal'vkun-uhokun +4,8..+5,2 C°. Ekstremumad oma −17,2 C° (uhoku) i +39,9 C° (heinku). Kezaaigan minimum om −0,6 C° (kezaku), tal'vaigan maksimum om +18,8 C° (uhoku). Ei voi panda halad heinkus-elokus (heinkun minimum om +2,2 C°). Paneb sadegid 568 mm vodes, kuidme läz tazomäras, vähemba uhokus-sulakus (32..36 mm kus), toižiš kuiš 47..58 mm kus.

Eläjad

Vn 2011 Suren Britanijan rahvahanlugemižen mödhe lidnan kaikenaigaižiden eläjiden lugu oli 123 900 ristitud, sen ližaks läz 25 tuhad üläopenikoid, vn 2021 — 145 674 ristitud. Kaik 124 900 eläjad oli lidnas vl 2017. Kaikiš suremb lidnan ristitišt om nügüd'.

Augotižlibundan mödhe (2021): evropalaižed — 74,6 % (britanijalaižed 53,0 %), azijalaižed — 14,9 %, afrikalaižed — 2,4 %, segoitadud augotižlibundan — 5,2 %, toižed rahvahad — 2,9 %.

Religijan mödhe (2021): religijatomad — 44,7 %, hristanuskojad — 35,2 %, islamanuskojad — 5,1 %, induistad — 2,3 %, buddistad — 1,1 %, judaizman uskojad — 0,7 %, sikhad — 0,2 %, toižed uskojad — 0,8 %, religijan ozutandata — 9,8 %.

Transport

Ezmäine raudtestancii om avaitud lidnas vspäi 1845. Raudten severz'-se jonoid ühtenzoitiba lidnad valdkundan toižidenke paloidenke, saudihe 19. voz'sadal. Kembridž Pohjoine-raudtestancii om letud vll 2014−2017, stancii lidnan suves planiruiše vodele 2025.

Lähembaine rahvahidenkeskeine lendimport om Londonan Stansted.

Irdkosketused

Lidnan oficialine sait (cambridge.gov.uk). (angl.)

Kembridž Vikiaitas