Kuläb

Kuläb
Кӯлоб

Valdkund	Tadžikistan
Eläjiden lugu (2020)	106,300 ristitud
Pind	35 km²
Telefonkod	+992−3322
Aigvö	UTC+5

Kuläb (tadž.: Кӯлоб [kʰɵˈlɔb] Kūlob, ven.: Куля́б [kʊˈlʲæp] Kuljab), toine suline nimi om Hatlon (tadž.: Хатлон [χɐtˈlɔn] Xatlon) om lidn Tadžikistanan suvipäivlaskmas. Se om valdkundan nellänz' lidn eläjiden lugun mödhe, mülüb Hatlonan agjaha, agjan kahtenz' surtte lidn. Om Kuläban rajonan administrativižeks keskuseks i ei mülü sihe.

Istorii

Amuine lidn, memorialine kompleks om saudud Kuläban 2700-voččen jubilejan oiktastuseks. Mainitase vspäi 737. Lidnuz om saudud 16. voz'sadal. Edeližed nimed oma Huttalän i Hatlon. Sai lidnan oficiališt statusad vl 1934. Vhesai 2015 Venäman sodabaz oli lidnas.

Kuläb šingotase sömtegimištol (liha- i maidproduktad, voitegim) i sauvondmaterialiden pästandal. Ühtenzoitase Moskvanke rahvahidenkeskeižen Kuläb-lendimportan kal't (TJU / UTDK).

Geografijan andmused

Kuläban rajonan sijaduz agjas i valdkundas vn 2009 kartal

Lidn sijadase agjan suvipäivnouzmas, Jahob-jogen alangištos (tadž.: Яхоб 160 km pitte, edel vn 2023 elokud Jahsu Яхсу, Pändžan oigedpol'ne bassein), Hazratišoh-mägisel'gan pohjanno, 580 m ü.m.t. keskmäižel korktusel.

Matkad Dušanbe-pälidnhasai om 175 km lodeheze, agjan Bohtar-keskushesai om 90 km päivlaskmha orhal vai 153 km avtoteidme, voib sadas raudtel-ki.

Klimat om Keskmeren toižendan, keza om räk. Voden keskmäine lämuz om +15,8 C°, kezakun-elokun +26..+28 C°, tal'vkun-uhokun +2..+5 C°. Paneb sadegid 468 mm vodes, enamba keväz'kus-sulakus (83..94 mm kus), kuiv sezon oleskeleb kezakus-sügüz'kus (12 mm pordos).

Eläjad

Vl 2010 lidnan eläjiden lugu oli 95 tuhad ristituid. Kaik 214,700 eläjad om lidnaglomeracijas (2020), agjan 6,5 procentad. Kaikiš suremb lidnan ristitišt om nügüd'.

Kuläban valdkundaline universitet A. Rudakin nimed (tadž.: Донишгоҳи давлатии Кӯлоб ба номи Абӯабдуллоҳ Рӯдакӣ) radab lidnas vspäi 1992, se om sätud opendajiden vaumičendan kahtes institutaspäi.

Galerei

• 
  Somonin ird lidnan keskuzpalas (2014)
• 
  Mir Sajid Ali Hamadani-filosofan da pühäpaginikan (1314−1384) mavzolei, vn 2016 nägu
• 
  Lidnan pätorgusen südäimes, sügüz'ku 2014
• 
  Tazovaldkundaline muzeikompleks (sulaku 2017)

Irdkosketused

• Lidnan tobmuden sait (kulob.tj). (tadž.)