Dušanbe

Dušanbe
Душанбе

Lidnanznam
Valdkund	Tadžikistan
Eläjiden lugu (2017)	820,600 ristitud
Pind	127,4 km²
Pämez'	Rustam Emomali (viluku 2017—)
Telefonkod	+992−37
Aigvö	UTC+5

Lidnan nell' rajonad vl 2012

Dušanbe (tadž.: Душанбе «ezmärg») om Tadžikistanan pälidn da kaikiš suremb lidn. Se om valdkundan üks' regionišpäi.

Istorii

Järed antine eländpunkt oli olmas 3.-4. voz'sadal edel meiden erad. Dušanbe-kišlak mainitase kirjutadud purtkiš ezmäižen kerdan vl 1676 (läz 8 tuhad eläjid), se sijazihe risttel, i kerazihe torgust jogo ezmärgel, sikš nimitihe-ki. Vl 1826 lidnan nimi oli Dušanbe-Kurgan. Mülüi Buharan emiratha (oli olmas vll 1753−1920).

Vspäi 1922 om Tadžikistanan pälidnaks. Vll 1924−1929 nimi oli Düšanbe (tadž.: Дюшанбе), vll 1929−1961 nimitihe Stalinabad:aks. Vl 1929 raudte ühtenzoiti lidnad Taškentanke.

Dušanbe šingotase sömtegimištol, sauvondmaterialiden sarakol (armatur, raudbeton), elektrotehnižel produkcijal (kabel'), tekstil'tegimištol, Keskuazijan torgusil.

Geografijan andmused

Lidn sijadase valdkundan päivlaskmas, 706 m ü.m.t. keskmäižel korktusel. Varzob-jogi (tadž.: Варзоб, 71 km pitte) läbitab Dušanbed pohjoižespäi suvhe i lankteb Kafirnigan-jogehe (tadž.: Кофарниҳон) lidnan suviröunas (Amudarj-jogen bassein). Seičeme transportišt sildad om saudud Varzobas päliči lidnan röunoiš. Voib olda lujid manrehkaidusid.

Dušanbe jagase nelläks rajonaks. Om ümbärtud rajonil tazovaldkundan alištusenke.

Eläjad

Vl 2014 eläjiden lugu oli 778 500 ristitud 124,6 km² pindal. Kaikiš suremb ristitišt om nügüd'. Enamba mi 1,5 mln ristitud elihe ezilidnoidenke vl 2017. Erazvuiččiden uskondoiden pühäpertid oma saudud lidnas.

Kaik 17 üläopendusen i enamba 100 keskopendusen aluzkundad oma olmas lidnas, mugažo 17 tedoinstitutad ratas.

Transport

Avtobusad, trolleibusad da maršruttaksid oma kundaližeks transportaks lidnas. Lendimport sijadase Dušanben päivnouzmas.

Irdkosketused

• Lidnan tobmuden oficialine sait (dushanbe.tj). (tadž.) (ven.)