Doh

Doh
الدوحة‎
(ad-Davha / ad-Dōha)

Valdkund	Katar
Eläjiden lugu (2020)	1,186,023 ristitud
Pind	158,72 km²
Telefonkod	+974-xxxx-xxxx
Aigvö	UTC+3

Lidnan kart metrojonoidenke (2015)

Doh (arab.: الدوحة‎ ad-Dawḥah [ædˈdæwħæ,-ˈdoː-], vepsän transkripcii: ad-Dauha vai ad-Dōha) om Kataran pälidn da kaikiš suremb lidn. Se om Ed Doh-municipalitetan administrativine keskuz mugažo.

Istorii

Eländpunktan aluz om pandud vl 1850 kuti Al' Bid-külä (arab. Al' Bida). Vll 1916−1971 Doh oli britanižen protektoratan administracijan keskuseks. Šingotaškanzi kivivoin löudmižsijiden otandan kävutamižhe jäl'ghe 1960-nzil vozil. Vspäi 1971 Doh om ripmatoman valdkundan pälidnaks.

Doh šingotase kivivoin i kalan ümbriradmižel. Valdkundan kivivoin i gazan päfaterad om saudud lidnas. Lidnan rahvahidenkeskeine lendimport ezitoitase järedaks aviasol'meks.

Geografijan andmused

Lidnan municipalitetan sijaduz valdkundan vn 2015 kartal

Lidn sijadase Katar-pol'saren päivnouzmas, Persijan lahten randal, merikaras ümbri (arab. dohati «laht»), 0..15 m korktusil, 3 m ü.m.t. keskmäižel korktusel.

Klimat om kuiv räk letetazangišton, päivoikaz, kezal eriližešti. Semendkun-sügüz'kun päivän keskmäine lämuz om +32..+35 C°, tal'vkun-keväz'kun — +17..+21 C°. Ekstremumad oma +3,8 C° (viluku) i +50,4 C° (heinku). Il'man lämuz voib ületada +32 C° miččel taht kul, ei voi olda madalamb mi +20 C° kezakus-sügüz'kus. Paneb sadegid 75 mm vodes, enamba tal'vkus-keväz'kus (12..17 mm kus), ani ei olele niid kezakus-redukus (üks' millimetr pordos). Kun keskmäine relätivine nepsuz vajehtase 45..55 % röunoiš sulakus-heinkus, 68..74 % kül'mkus-uhokus.

Eläjad

Vl 1970 (edel Kataran pälidnan statusad) lidnan ristitišt oli 80 tuhad eläjid. Kaik 299 300 eläjad oli lidnas vl 2001. Vl 2010 lidnan-municipalitetan (lidnan fartalad i erigoittud tegimišton zon suvipäivlaskmas) eläjiden lugu oli 796 947 ristitud, vl 2015 — 956 457 ristitud, ristitišt sureni sen paloin municipalitetan jäl'ghižen levigandusen tagut. Kaikiš suremb lidnan ristitišt om nügüd', otab valdkundan eläjiden pol't. Tulijad verhiš maišpäi sündutadas vagahaižiden enamba koumed nelländest.

Ezmäine škol oli avaitud vl 1952. Doh om valdkundan üläopendusen keskuz.

Lidn vastsi vn 2006 Azijan vändoid. Moto GP-čempionatan etap oleskeleb joga vodel Losal'-avtodromal. Vl 2022 Doh linni Mail'man futbolčempionatan vändoiden keskuseks.

Transport

Metropoliten i taksid oma kundaližeks transportaks lidnas. Metro radaškanzi vl 2019 (37 stancijad koumel jonol, 76 km raudted), sen nellänz' jono om sauvomižes i linneb vaumitud vodele 2025. Hamad-meriport radab suvhe lidnaspäi vspäi 2017 (7,8 mln tonnoid jüguid joga vodel), se om saudud vll 2010−2020.

Rahvahidenkeskeine Hamad-lendimport. Se radab vspäi 2014, vajehti Dohan lendimportad, om nimitadud valdkundan edeližen emiran oiktastuseks.

Galerei

• 
  Islaman Doh-pühäpert', vn 2023 nägu
• 
  Valdkundaline mečet' (se-žo Muhammad ibn Abd al' Vahhab-imaman pühäpert'), vn 2011 nägu
• 
  Katoline Jumalanmaman Pühän Rozarijan jumalanpert', vn 2013 nägu
• 
  Lidnan keskuzpalan nägu Man kaimdajaspäi vl 2016
• 
  Al' Džazira-mediaverkon arabankel'ne päfater Dohas vl 2008
• 
  Kataran kul'turankülä (2013)
• 
  Openduzlidnut Dohan ezilidnas (2019)
• 
  Islamižen čomamahton muzei (2012)
• 
  Koumesadametrine Aspire Tower-adivpert' (se-žo The Torch Doha «Dohan tervač») Doha Sports Sitiš, päivlaskmaine ezilidn (2013)
• 
  Rahvahidenkeskeižen Hamad-lendimportan terminal vl 2014