Amman

Amman
عمّان (Ammān)

Valdkund	Jordanii
Eläjiden lugu (2016)	4,007,526 ristitud
Pind	1,680 km²
Pämez'	Jusuf Šavarbeh (eloku 2017—)
Telefonkod	+962−6
Aigvö	UTC+2

Ammanan administrativižed ümbrikod

Amman (araban kelel: عمّان Ammān [ʕamːaːn]) om Jordanijan pälidn da kaikiš suremb lidn. Se om mugažo Pälidnan agjan (Ammanan agj) administrativine keskuz.

Istorii

Amman om ristitun üks' kaikiš amuižembiš eländpunktoišpäi mail'mas. Mainitase ezmäižen kerdan 13. voz'sadal edel m.e. kuti Rabbat-Ammon. Rimalaižen imperijan aigan nimitihe Filadel'fij:aks.

Pen' lidnut šingotaškanzihe, konz Ottomanan imperijan ohjastai päti sauda «Damask — Medin»-raudted (1900−1908) vedamha hadžan palomnikoid, i se läbiti lidnad. Municipalitetan aluz om pandud vl 1909. Raudten Jordanijan pala radab nügüd'-ki.

Geografijan andmused

Lidn seižub seičemel kukhal, 700..1100 m korktusil, 773 metrad valdmeren pindan päl keskmäižel korktusel, sijadase 65 kilometrad päivnouzmpolehe Jerusalimalpäi.

Klimat om tropine kuiv. Paneb sadegid 270 mm vodes, kezakul-sügüz'kul sadegid ei oleskele ani.

Amman jagase 27 nimitadud ümbrikoks.

Eläjad

Vl 2010 eläjiden lugu oli 2 842 629 ristitud 1 680 nellikkilometrad pindal. Kaikiš suremb ristitišt om nügüd'.

Läz pol'tošt millionad ristituid verhanmaiženke augotižlibundanke elädas lidnas vl 2015, enamba kaiked Sirijaspäi (435 tuh.), Egiptaspäi (390 tuh.) i Palestinaspäi (308 tuh.).

Transport

Avtobusad, kiruhavtobusad da taksid oma kundaližeks transportaks lidnas.

Kaks' rahvahidenkeskešt aeroportad ratas lidnas. Civiline Amman-lendimport (ADJ) sijadase koumes kilometras lidnan keskusespäi, otab čarter- da VIP-lendimid lähižiš maišpäi, kävutase enamba kuti openduzsija lendajiden täht. Sil om sodaznamoičendoid-ki. Alija-kunigaznaižen nimel nimitadud rahvahidenkeskeine lendimport (AMM) sijadase 30 km suvipolehe lidnalpäi. Se om civiline, tehtas reisid äjihe verhiže maihe.

Irdkosketused

• Lidnan ohjastusen oficialine sait (ammancity.gov.jo). (arab.) (angl.)