Damask

Damask
دمشق
(Dimašk)

Lidnanznam	Flag
Valdkund	Sirii
Eläjiden lugu (2024)	2,799,960 ristitud
Pind	105 km²
Pämez'	Muhammad Jasir Gazal (tal'vku 2024—)
Telefonkod	+963−11
Aigvö	tal'vel UTC+2, kezal UTC+3

Lidnan kart (2011)

Damask (arab.: دمشق Dimašk, sijaline virkand: [dɪˈmaʃʔ], vai arab.: الشام‎ Eš Šam, amuiževr.: דַּמֶשֶׁק Damešek) om Sirijan pälidn da kahtenz' lidn eläjiden lugun mödhe (Aleppon jäl'ghe, vn 2022 andmused). Se om valdkundan agjaks (muhafazaks).

Istorii

Eländpunkt mainitaškanzihe läz 2500. vot EME. Se om kaikiš amuižemb pälidn mail'mas nügüdläižišpäi, om amuižembiš elänzoittud eländpunktoišpäi. Lidnan nimen variant Evropan keliš om ottud grekan Δαμασκός-nimitusespäi Damaskos, kudamb libub aramejan kelen 𐡃𐡌𐡔𐡒-sanaspäi Damašq «eländkodi» i korreliruib lidnan Dammeśeq-nimenke (דַּמֶּשֶׂק) Biblijan evrejan kelel. Mödihe Evropha damaskan terast i stöklad 13. voz'sadan kahtendes poles. Vl 1300 Mongolijan sodaväged rikoihe lidnan äjid eläjid i tegihe surt varghut. Vl 1400 Tamerlanan väged panihe lidnad mantazole i sirdihe azegentegijoid da käziradajid Samarkandha.

Om ripmatoman Sirijan pälidnaks vspäi 1943. Vspäi 2012 tora lidnfartaloihe näht mureni äjid niid Rahvahanikoiden sodan aigan.

Geografijan andmused

Lidnan sijaduz valdkundas vn 2010 kartal

Lidn sijadase valdkundan suvipäivlaskmas, Sirijan Päivnouzmaižel mägitazangištol, 680 m ü.m.t. korktusel. Barad-jogi (arab.: بردى‎ Baradá 71 km pitte) läbitab lidnad da kadotab nitjärvihe. Keskmeren rand sijadase kahesakümnes kilometras päivlaskmha Livanan territorijal.

Klimat om subtropine kuiv kacmata meren lähembushe, Päivnouzmaine Livanan mägisel'g sauptab sadegiden ličendad. Keza om päivoikaz lujas, lühüdaigaine tal'v om pil'vekaz. Ul'traruskedsinižen sädegoičendan indeks om 8..12 sulakus-sügüz'kus. Voden keskmäine lämuz om +16,6 C°, kezakun-sügüz'kun +23,2..+26,3 C°, tal'vkun-uhokun +5,9..+7,8 C°. Ekstremumad oma −12,0 C° (uhoku) i +45,8 C° (heinku). Kezaaigan minimum om +6,2 C° (kezaku), tal'vaigan maksimum om +28,0 C° (uhoku). Ei voi panda halad semendkus-sügüz'kus, redukun minimum om −1,0 C°. Paneb sadegid 125 mm vodes, enamba kül'mkus-keväz'kus (14..26 mm kus), kuiv sezon oleskeleb sulakus-redukus (18 mm pordos), ei ole sadegid ani heinkus-elokus, ned oma harvad lujas kezakus i sügüz'kus. Paneb lunt tal'ven kahtes päiväs keskmäras. Kun keskmäine relätivine nepsuz vajehtase 41..47 % röunoiš semendkus-sügüz'kus, 63..76 % kül'mkus-uhokus, 50..59 % toižiš kuiš.

Tobmuz

Lidnan kuz'toštkümne nimitadud rajonad vl 2014

Damask jagase kaks'kümneks koumeks nimitadud lidnrajonaks (vl 2017).

Eläjad

Vl 2009 lidnan eläjiden lugu oli 1,711,000 ristitud. Rahvahanikoiden sodan zavodindan jäl'ghe vl 2011 pagenuded mehed da pordaigaližed sirdanuded ližaduiba lidnan ristitištod znamasižešti. Kaik 2,503,000 eläjad oli lidnas vl 2022.

Religijan mödhe islamanuskojad-sunnitad oliba enambuses (enamba mi kaks' tuhad mečetid om saudud), hristanuskojad ottas kümnendest ristitištos, mugažo evrejalaižiden pen' kund eläb.

Galerei

• 
  Damaskan Sur' mečet' (Omeijadoiden mečet', letihe vl 715), nägu vn 2008 elokus
• 
  Bank Al-Sharq i Blue Tower Hotel, semendku 2010
• 
  Lidnan operteatr (sulaku 2010, om saudud vl 2004)
• 
  Al'-Faihaa-stadion

Irdkosketused

• Lidnan oficialine sait (damascus.gov.sy). (arab.)