Abu Dabi

Abu Dabi
ابوظبي

Flag
Valdkund	Araban Ühtenzoittud Emiratad
Eläjiden lugu (2013)	921 000 ristitud
Pind	67,34 km²
Pämez'	Halifa ibn Zaid al'-Nahajan (2 004-)
Telefonkod	+971-2
Aigvö	UTC+4

Abu Dabi (arab.: ابوظبي) om Araban Ühtenzoittud Emiratoiden pälidn (pordaigaline vspäi 1971, kaikenaigaine vspäi 1996). Se om valdkundan kahtenz' surtte lidn (Dubain jäl'ghe), mugažo ühtennimižen emiratan pälidn (vspäi 1793). Lidnaglomeracijas elädas pol'tošt millionad ristituid.

Lidn om järedan kivivoinsamižregionan administrativine, finansine, transportine da ohjanduzkeskuz. Lidnan da valdkundan pämez' (emir) om Halifa ibn Zaid al'-Nahajan (vs 2004 kül'mkun 3. päiväspäi).

Istorii

Enččed eländpunktad lidnan territorijal oliba olmas 3 voz'tuhaspäi edel meiden erad.

Nügüdläižen eländpunktan aluz om pandud läz 1760 vot, ei edahan reskveden manalaižes purtkespäi. Pit'kan aigan eläjiden rad oli kalan püdo i hel'men samine. Vl 1958 löuzihe kivivoin ezmäižid manalaižid pöudoid lidnan ümbrištos. Vl 1968 levitandan ezmäine plan tuli väghe, lidn šingotaškanzi lujas.

Tegimed oma saudud ezilidnoiš: kivivoinhimine kompleks (Umm Enn Nar), cementtegim, turuprokatine i laivansauvomižen tegimed (El' Mussafah).

Geografijan andmused

Abu Dabin fotokuva kaimdajaspäi.

Lidn sijadase sarel, Persijan lahten suvirandal, sen ezilidnad — Arabijan pol'saren lähižel randal. Sarelpäi kontinenthasai om kilometran nelländez matkad, ned ühtenzoittas koumel sildal. Völ kaks' levedad sildad ühtenzoittas Abu Dabi-sart lähembaižidenke Al'-Rim- i Saadijat-saridenke.

Klimat om letetazangišton räk kuiv. Kaks'kümne puištod da viherzoittud territorijad om lidnas, kasteltas kaikid niid. Vilukun keskmäine lämuz om +18,5°C, heinkun da elokun kesklämuz om +35°C. Paneb sadegid 57 mm vodes, sidä kesken 35 mm uhokus-keväz'kus.

Eläjad

Vl 1960 Abu Dabin eläjiden lugu oli 25 tuhad ristituid, vl 2003 — 552 000 ristituid. Pind om 67 km². 40 lidnrajonad da ezilidnad sijadase Abu-Dabi-sarel, kontinental da lähižil saril. Nell' eläjad videspäi oma immigrantad.

Kaikiš suremb pühäpert' om islaman Zaid-šeihan sur' mečet'.

Transport

Avtobusad, laivad, punolendimed i taksid oma kundaližeks transportaks lidnan südäimes. Avtoted oma levedad, om koume ted kaikuččes poles. Vspäi 2013 metro sauvose lidnas, vodele 2020 metron jono (18 km raudted) da kebnan metron kaks' jonod (28 km raudted, 45 stancijad) radaškatas lidnas da sen kaimdailidnoiš.

Kiruhte ühtenzoitab lidnad Dubainke. Rahvahidenkeskeine civiline Abu-Dabi-lendimport (AUH) sijadase 30 km päivnouzmha lidnan keskusespäi, sišpäi tehtas reisid mail'man äjihe maihe, enamba islamanuskojiden maihe da Indijha, mugažo Arabijan pol'saredme.

Irdkosketused

• Abu Dabi-lidnan da emiratan oficialine portal. (arab.) (angl.)