Lelistad

Lelistad
Lelystad
Lidnanznam;	Flag;
Valdkund	Alamad
Eläjiden lugu (2021)	79,811 ristitud
Pind	765,45 km²
Pämez'	Mike Baltus; (kezaku 2021—,; Mieke Baltus)
Telefonkod	+31−320
Aigvö	tal'vel UTC+1,; kezal UTC+2

Lelistad (alam.: Lelystad [ˈleːlistɑt]) om Alamaiden lidn, Flevoland-agjan administrativine keskuz (vspäi 1986) da sen üks' kudes kundaspäi.

Istorii

Eländpunktan aluz om pandud vl 1967 tahondas kuivatoitmižradoiden jäl'ghe. Nimitihe Afslöitdeik-damban Kornelis Leli-projektirujan kanzannimen mödhe, se om saudud vll 1927−1933 i laski tehta kuivatoitmišt. Lidnankund om sätud vl 1980, levitase kuivatud da pudotadud territorijal täuzin.

Lelistad šingotase severzil-se biznesparkoil i tegimil: kartohkčipsoiden pästand, «Giant»-kompanijan velotegim, sauvondan i telekommunikacijoiden edheotandad. Meriport i lendimport ratas lidnankundas. Eläjiden znamasine pala radab Amsterdamas.

Geografijan andmused

Lidn sijadase agjan keskuzpalas, koume..viž metrad alemba meren tazopindad. Municipalitetan kuivma otab 230,32 km², toine om vezi (535,13 nellikkilometrad).

Matkad Amsterdaman keskuzpalhasai om nell'kümne koume kilometrad päivlaskmha-suvipäivlaskmha orhal, 58 km avtol vai raudtedme.

Klimat om ven valdmeren. Keza om päivoikaz, tal'vaig om pil'vekaz lujas. Voden keskmäine lämuz om +10,2 C°, kezakun-elokun +15,8..+17,8 C°, tal'vkun-elokun +3,2..+3,9 C°. Kaikiš lujemb pakaine oleli −22,9 C° (uhoku), räk +37,5 C° (heinku). Kezaaigan minimum om +1,8 C° (kezaku), tal'vaigan maksimum om +18,8 C° (uhoku). Ei voi panda halad kezakus-sügüz'kus vaiše (sügüz'kun minimum om +2,4 C°). Paneb sadegid 824 mm vodes, läz tazomäras kuidme, enamba heinkus-elokus (91..92 mm kus), vähemba sulakus (42 mm). Kun keskmäine relätivine nepsuz vajehtase 75..82 % röunoiš keväz'kus-elokus, 87..90 % redukus-uhokus, 84 % sügüz'kus.

Tobmuz

Kundan suim kogoneb 37 ühtnijaspäi (edel 2022. vot oli 33..35 ühtnijad), valitas heid nelläks vodeks.

Lidnankundan tobmuden pämez' om burgomistr (alam.: burgemeester van gemeente Lelystad). Edeližed lidnan pämehed oma Ina Adema (sügüz'ku 2016 — sügüz'ku 2020), Margrit Horselenberg (Margreet Horselenberg, uhoku 2006 — sügüz'ku 2016).