Liberii (Kostarik)

Liberii
Liberia
	Flag;
Valdkund	Kostarik
Eläjiden lugu (2022)	65,922 ristitud
Pind	563,02 km²
Telefonkod	+506
Aigvö	UTC−6

Sil sanal voib olda toižid znamoičendoid; miše nähta niid, tulgat tänna.

Liberii (isp.: Liberia [li.ˈβe.ɾja]) om lidn Kostarikan lodehes. Se om Guanakaste-agjan administrativine keskuz (vspäi 1849) da kaikiš suremb lidn eläjiden lugun mödhe.

Istorii

Eländpunktan aluz om pandud vl 1769 kuti Guanakaste-futor lidnoidenkeskeižen risttel. Matkadajad lebaižihe siš paksus. Vspäi 1826 om pandud Kostarikan palaks, eile Nikaraguan, sikš miše lähižed lidnad valičiba Kostarikad vl 1824. Vl 1836 Guanakaste sai lidnan statusad. Vn 1854 semendkuspäi lidn om olmas nügüdläiženke nimenke. Lidn oli maižanduzrajonan keskuz (kabjživatišton kazvatand), Panamerikaižen manten sauvond ližazi sile znamoičendad. Liberii om agjan kaikiš surembaks punktaks matkadajiden täht valdmeriden randištoiden keskes.

Lidn šingotase turizmal (muzejad, zoopark, rahvahaližed puištod hulidenke purtkidenke i vezilanktendoidenke). Nimitadas «vauktaks lidnaks» (la ciudad blanca) sildatadud vauktal gravijal teiden tagut, kolonialižen arhitekturan pertid oma vauktan mujun tobjimalaz.

Geografijan andmused

Lidn sijadase agjan keskuzpalas, 144 m ü.m.t. keskmäižel korktusel. Sen fartalad ottas kantonan pen't palad vaiše. Liberii-jogi lankteb Tempiske-jogehe, a se Tünen valdmeren Nikoi-lahthe.

Kaik koume avtoted läbitadas lidnad. Matkad San Hose-pälidnhasai om 215 km suvipäivnouzmha, Nikaraguan röunhasai om 75 km lodeheze, pohjoižhe i pohjoižpäivnouzmha.

Klimat om tropižen savannan kaks'sezonine. Se om päivoikaz lujas da kuiv tal'vkus-sulakus, pil'vekaz da neps semendkus-kül'mkus. Om räk vodes läbi, kun keskmäine lämuz vajehtase +25,7..+28,7 C° röunoiš voden aigan. Paneb sadegid 1600 mm vodes, enamba sügüz'kus-redukus (310..346 mm kus), vähemba vilukus-keväz'kus (1..4 mm kus).

Eläjad

Vn 2011 Kostarikan rahvahanlugemižen mödhe lidnan eläjiden lugu oli 53,382 ristitud, agjan kudendez, vn 2022 — 65,922 ristitud. Kaikiš suremb lidnan ristitišt om nügüd'.

Valdkundan kahtenz' surtte rahvahidenkeskeine lendimport (LIR, 1,1 mln passažiroid vl 2019) radab koumetoštkümnes kilometras päivlaskmha lidnaspäi. Se ühtenzoitab AÜV:oiden, Kanadan i Päivlaskmaižen Evropan erasidenke-se järedoidenke lidnoidenke.

Galerei

Ph. Marijan vigatoman sugutandan päjumalanpert' (katoline) lidnan keskuztorgul, vn 2011 semendkun nägu
Nacionaline universitet, Liberii-lidnan kampus (2011)
Lidnan stadion (keväz'ku 2014)
Rahvahidenkeskeižen Guanakaste-lendimportan päsauvuz, keväz'ku 2015

Homaičendad

Liberii (Kostarik) Vikiaitas