Manisales

Manisales
Manizales
Lidnanznam;	Flag;
Valdkund	Kolumbii
Eläjiden lugu (2022)	454,077 ristitud
Pind	571,84 km²
Pämez'	Karlos Mario Marin Korrea; (2020−2023,; Carlos Mario Marín Correa)
Telefonkod	+57−6
Aigvö	UTC−5

Manisales (isp.: Manizales [maniˈsales]) om lidn Kolumbijan keskuzpalan päivlaskmas. Se om Kal'das-agjan (departamentan) administrativine keskuz.

Istorii

Eländpunktan aluz om pandud vl 1849.

Manisales om kofen kazvatandan znamasine keskuz. Valdkundan kahtenz' üläopendusen keskuz, seičeme universitetad oma päfateroid vai palakundoid siš, läz 30 tuhad üläopenikoid. Nece tegimišt šingotase ezilidnoiš: metallurgii, kengiden i räzinan pästand, pezendabutusiden tehmine, sömtegimišt (kofen sortiruind i pakuitez, šokolad, likörad), programholitusen edheotandad. Tetab Suviamerikas futbolan keskuz, Palogrande-stadion mülütab 30 tuhad kacujid.

Geografijan andmused

Lidn sijadase Činčin-jogen basseinas, Andiden pautkil, 2160 m ü.m.t. keskmäižel korktusel. Andiden kaikiš korktemb Nevado-del'-Ruis-vulkan (5321 m) om nell'kümnes kilometras pohjoižhe lidnaspäi, se om väges, manrehkaidused i reduvalud oma paksud.

Klimat om subtropine korktoiden mägiden, pil'vekaz vodes läbi, lähižed madalambad tahondad elädas ekvatorialižes klimatas. Kun keskmäine lämuz om +16,6..+17,2 C° voden aigan. Ekstremumad oma +1,3 C° (reduku) i +32,0 C° (semendku). Paneb sadegid 1583 mm vodes, kuivamb heinkus-elokus (74 mm kus), vihmoiden kaks' päd: redukus (209 mm kus) i sulakus (176 mm kus). Kun keskmäine relätivine nepsuz vajehtase 81..86 % röunoiš voden aigan.

Eläjad

Vl 2015 lidnan municipalitetan eläjiden lugu oli 396,102 ristitud 571,84 km² pindal. Kaikiš suremb lidnan ristitišt om nügüd'. Läz 580 tuhad ristituid elädas ezilidnoidenke (2018).

Galerei

Lidnan tobmuden sauvuz (2023)
Jumalanmaman Rozarijan bazilikjumalanpert' (katoline, saudihe vll 1928−1939), vn 2010 nägu
Kal'dasan universitet (2007. voz' vai sen aigemba)
Kervačten üks' stancijoišpäi vl 2013