Mine sisu juurde

Maturin

Vikipedii-späi
Maturin
Maturín
 Lidnanznam
 Flag
Valdkund Venesuel
Eläjiden lugu (2023) 753,254 ristitud
Pind 559 km²
MaturinMaturín
Pämez' Ana Fuentes
(2021—)
Telefonkod +58-(0)291
Aigvö UTC−4

Maturin (isp.: Maturín [matuˈɾin]) om lidn Venesuelan pohjoižpäivnouzmas. Se om valdkundan kahesanz' lidn eläjiden lugun mödhe, Monagas-štatan administrativine keskuz da pala.

Eländpunktan aluz om pandud vn 1760 tal'vkus kuti franciskalaižiden katoline missii kändmaha indejalaižid ičeze uskojikš.

Maturin šingotase kivivoin samižel da ümbriradmižel. Se om valdkundan päivnouzman znamasižeks transporttesol'meks.

Geografijan andmused

[vajehta | vajehtada lähtetekst]
Maturin-municipalitetan sijaduz štatas i valdkundas vn 2017 kartal

Lidn sijadase štatan keskuzpalan pohjoižes-lodehes, municipalitetan lodehes, 67 m ü.m.t. keskmäižel korktusel.

Matkad Kariban meren randhasai om vižkümne kilometrad pohjoižpäivnouzmha. Matkad Karakas-pälidnhasai om 415 km päivlaskmha orhal vai 495 km avtoteidme.

Klimat om tropižen savannan, räk da päivoikaz. Voden keskmäine lämuz om +26,6 C°, kuidme +25,3..+27,6 C° voden aigan. Ekstremumad oma +16,1 C° (kezaku) i +39,7 C° (semendku). Il'man lämuz voib ületada +35 C° miččel taht kul. Paneb sadegid 1433 mm vodes, enamba kezakus-elokus (197..220 mm kus), vähemba uhokus-sulakus (37..47 mm kus). Kun keskmäine relätivine nepsuz vajehtase 70..76 % röunoiš voden aigan.

Valitas lidnan pämest nelläks vodeks. Edeline lidnan municipalitetan pämez' om Vil'fredo Ordas (Wilfredo Ordaz, 2016−2021).

Vn 2011 Venesuelan rahvahanlugemižen mödhe lidnan ristitišt oli 447,283 eläjad. Vl 2015 lidnan eläjiden lugu oli 514,046 ristitud 157 nellikkilometrad pindal. Kaiken municipalitetan pind om 13,352 km².

Kaik seičeme valdkundališt i koume privatišt universitetad oma palakundoidenke lidnas. Koumen privatižen institutan kampusad anttas üläopendust mugažo. Kaik ned baziruišoiš valdkundan toižiš suriš lidnoiš. Znamasine om Päivnouzmaižen universitetan (Kumana) palakund («südäituk»[1], isp.: Universidad de Oriente (UDO) Núcleo de Monagas), radab vspäi 1960, sen kaks' kampusad oma lidnas i üks' ezilidnas.

Kaikiš suremb valdkundas «Monumental' de Maturin»-futbolstadion (52 tuh. kacujid) om avaitud lidnas.

Avtobusad (65 maršrutad municipalitetas), mikroavtobusad i maršruttaksid oma kundaližeks transportaks lidnas.

Rahvahidenkeskeine civiline Hose Tadeo Monagas-lendimport (MUN / SVMT) radab. Tehtas reisid Venesuelan erasihe-se järedoihe lidnoihe. Ende oli reisid Trinidadha, vl 2026 planiruihe reisid Santo Domingoho.

  1. ↑ Päivnouzmaižen universitetan Monagasan palakundan sait (monagas.udo.edu.ve). (isp.)