Mecoi

Mecoi
Mecoin ižač («must mecoi») kimhan aigan
Tedoklassifikacii
Valdkund: Živatad Tip: Sel'gjäntkeižed (Chordata) Klass: Lindud (Aves) Heimkund: Kananvuiččed (Galliformes) Sugukund: Fazanižed (Phasianidae) Heim: Mecoid (Tetrao) Erik: Mecoi
Latinankel'ne nimi
Tetrao urogallus (Linnaeus, 1758)
Areal
Sistematik Vikierikoiš Kuvad Vikiaitas ITIS 553893 NCBI 100830

Emämecoi, Ročinma

Mecoi (latin.: Tetrao urogallus) om levitadud Evrazijan meclind Fazanižed-sugukundaspäi. Erištadas kahesa alaerikod.

Ümbrikirjutand

Kehker händ i pit'kad höunhed kurkul oma mecoin nägujikš tundusikš. Ižačun maihutuzkeskust sase 1,4 metrhasai, täuz'kaznu oleleb 4,1..6,5 kg vedutte. Emäčud oma penemba koumandeses i vedadas läz kaht kilogrammad. Suguiden mujund om erazvuitte mugažo.

Elonmahtuz

Mecoi om poligamine lind. Vaiše koppal haudub poigaižid, sid' kaičeb heid üks'näze.

Kim' tuleb keväz'kus-semendkus tobjimalaz, sen aigan mecoi kadotab herküst i edhenägendad, kändase šlipkmel'žeks. Än' kuluse ristituile pol'kilometras. Toižen aigan lind om varukaz lujas, nägemine i kulemine oma hüväd. Lendab hubin, lühüdoil keskustoil.

Lind om mectusen objektaks. Navedib samalsoid mecas marjoidenke, kavag'mecoid i segoitadud mecad, voib vastata lehtezmecas harvoin. Eläb päiväd man pindal tobjimalaz, ödub puiden oksil.

Söte

Kevädel da kezal mecoi söb vezoid, änikoid, puiden urbid, lehtesid, heinäd, mecmarjoid, semnid i gavedid. Sügüzen tulendanke lind otab sötkeks lehtkuzen kavaged. Tal'vel eläb pedajan da kuzen kavagid, urbid. Lindunpoigaižed södas gavedid da hämähoukuid.

Alaerikod

Rahvahidenkeskeine ornitologoiden ühtištuz lugeb mecoin kahesad alaerikod (vn 2024 sügüz'kun olend):

• Tetrao urogallus cantabricus Castroviejo, 1967
• T. u. aquitanicus Ingram, 1915
• T. u. crassirostris Brehm, 1831
• T. u. urogallus Linnaeus, 1758
• T. u. kureikensis Buturlin, 1927
• T. u. volgensis Buturlin, 1907
• T. u. uralensis Nazarov, 1886 — vaugedpökuine mecoi
• T. u. taczanowskii (Stejneger, 1885)

Mecoihe sidodud vepsän tärtused

• Koppal — emämecoi.
• Must mecoi — mecoin ižač.
• Ribitez — sija, kus eläb äi mecoid i tedroid.

Irdkosketused

• Kons kim'däs tedrot i meceit // Vepsän kelen korpus. — #140.
• Kut kävin' mecoid' samha // Vepsän kelen korpus. — #33.