Mostar

Mostar (vep., bosn. i horv.)
Мостар (serb.)
Lidnanznam;	Flag;
Valdkund	Bosnii da Gercegovin
Eläjiden lugu (2013)	113,169 ristitud
Pind	1,175 km²
Pämez'	Mario Kordič; (uhoku 2021—,; Mario Kordić)
Telefonkod	+387-(0)36
Aigvö	tal'vel UTC+1,; kezal UTC+2

Mostar (mugažo bosnijan i horvatan kelil, serb.: Мостар, virktas [mǒstaːr]) om lidn da kund (Grad Mostar) Bosnijan da Gercegovinan suves. Se om valdkundan videnz' lidn eläjiden lugun mödhe, Gercegovinan da Neretvan kantonan administrativine keskuz Bosnijan da Gercegovinan Federacijas.

Istorii

Eländpunkt mainitase ezmäižen kerdan vl 1474 nügüdläiženke nimitusenke. Mostari znamoičeb «sildan pidajad».

Mostar šingotase alüminijan tehmižel, gidroenergetikal, vinan edheotandoil. Avto- i raudteiden znamasine keskuz.

Geografijan andmused

Lidn sijadase municipalitetan keskuzpalas, Neretv-jogen randal (bosn.: Neretva 225 km pitte, lankteb Adriatižhe merhe), 60 m ü.m.t. keskmäižel korktusel.

Matkad Sarajevo-pälidnhasai om seičemekümne kaks' kilometrad pohjoižpäivnouzmha orhal vai 130 km avtotedme.

Klimat om subtropine. Keza om päivoikaz lujas, tal'vaig om pil'vekaz. Voden keskmäine lämuz om +15,5 C°, kezakun-elokun +23,1..+26,3 C°, tal'vkun-uhokun +5,9..+7,2 C°. Ekstremumad oma −10,9 C° (viluku) i +46,2 C° (heinku). Kezaaigan minimum om +8,0 C° (kezaku), tal'vaigan maksimum om +25,0 C° (uhoku). Ei voi panda halad semendkus-sügüz'kus, redukun minimum om −0,1 C°. Paneb sadegid 1445 mm vodes, enamba kül'mkus-tal'vkus (181..189 mm kus), vähemba heinkus-elokus (56..58 mm kus). Paneb lunt tal'ven kudes päiväs keskmäras. Kun keskmäine relätivine nepsuz vajehtase 54..55 % röunoiš heinkus-elokus, 65..71 % redukus-vilukus, 59..62 % toižiš kuiš.

Eläjad

Vn 2013 valdkundan rahvahanlugemižen mödhe lidnan eläjiden lugu oli 60,195 ristitud, kaiken kundan — 105,797 ristitud. Kaikiš suremb kundan ristitišt oli 126,628 eläjad vl 1991.

Rahvahad (2013): horvatijalaižed — 48,4 % (katolikad päpaloin), bošnäklaižed — 44,1 % (islamanuskojad), serbalaižed — 4,1 % (ortodoksižed hristanuskojad), toižed rahvahad — 3,4 %.