Novosil'

Vikipedii
Mine navigeerimisribale Mine otsikasti
Novosil'
Новосиль
 Lidnanznam
Coat of arms of Novosil (2010).gif
 Flag
Flag of Novosil (Oryol oblast).png
Valdkund Venäma
Eläjiden lugu (2018-01-01) 3 175 ristitud
Pind 5,14 km²
Novosil' Новосиль
Pämez' Valentina Ščukina
(kül'mku 2 013—)
Telefonkod +7-48 673-xx-xxx
Avtokod 57
Aigvö UTC+3 (MSK+0)


Novosil' (ven.: Новоси́ль) om Venäman lidn da lidnankund Orelan agjan pohjoižpäivnouzmas. Se om Novosilin rajonan administrativine keskuz da pala.

Istorii[redaktiruida | redaktiruida purde]

Amuižed eländpunktad oliba olmas lidnan sijas da sen ümbrištos edel meiden erad völ, arheologijan andmusiden mödhe. Nügüdläine eländpunkt mainitase ezmäižen kerdan Nikonan aigkirjas vl 1195 kuti Novosil'-lidn da lidnuz. Se oli Novosilin ruhtinazkundan keskuseks (1352 — 1430-nded voded). Mülüi Surhe Litvanman ruhtinazkundha 15. voz'sadal. Vspäi 1494 alištub Moskvan tobmudele. Novosil' oli makundan keskuseks vspäi 1708, sai makundan lidnan oficiališt statusad vl 1777. Šingotihe torgovanoiden i käziradajiden lidnaks. Toižen mail'man sodan aigan lidn oli okkupiruidud nacistoil (13. kül'mku — 27. tal'vku 1941), jäi frontan pirdanno vn 1943 heinkuhusai i oli pandud mantazole läz täuzin. Om udessündutadud 20. voz'sadan kahtendes poles.

Novosil' šingotase turizmal i maižanduzrajonan keskuseks, ei ole tehmišton edheotandoid. Ende savičtegim i konservtegim radoihe.

Geografijan andmused[redaktiruida | redaktiruida purde]

Lidn sijadase rajonan suvipalas, Zuš-jogen oiktal korktal randal (ven.: Зуша 234 km pitte, Okan üläjoksmusen oiged ližajogi), 220 m ü.m.t. keskmäižel korktusel. Matkad Orelhasai om 65 km päivlaskmha orhal vai 82 km avtotel. Toine lähembaine lidn om Mcensk 46 km lodeheze orhal vai 53 km avtotedme. Lähembaine raudtestancii om Zalegošč (ven. Залегощь) 14 km suvipäivlaskmha avtotedme, radab «Orel — Jelec»-keskustal.

Novosil' om lidnankundan üks'jäine eländpunkt. Lidnankundan pind — 5,14 km².

Eläjad[redaktiruida | redaktiruida purde]

Vl 1897 lidnan ristitišt oli 2 912 eläjad, vl 1939 — 3 332 eläjad. Vn 2010 Venäman rahvahanlugemižen mödhe lidnan eläjiden lugu oli 3 658 ristitud, rajonan koume seičemendest. Kaikiš suremb lidnan ristitišt oli 4 800 eläjad vl 1913 i enamba 4 tuhad eläjid vll 1989−2003 (4 600 rist. vll 1996−2000). Ortodoksižen hristanuskondan ph. Mikulai-čudonsädajan jumalanpert'[1] (1810−1813) om kaičenus lidnas. Novosilin Pühän Hengen mez'jumalankodi om saudud 3 km päivlaskmha lidnaspäi.

Rahvahad (2010): venälaižed — 94,8%, ukrainalaižed — 1,2%, toižed rahvahad — 4,0%. Novosilin kozakišton sebr.

Professionaližen opendusen aluzkund om Orelan agrobiznesan da servisan tehnikum — Novosilin filial[2].

Galerei[redaktiruida | redaktiruida purde]

Homaičendad[redaktiruida | redaktiruida purde]

  1. Novosilin pühäpertid sobory.ru-saital. (ven.)
  2. Novosilin filialan lehtpoled Orelan agrobiznesan da servisan tehnikuman mgal.orel.ru-saital. (ven.)

Irdkosketused[redaktiruida | redaktiruida purde]



Orelan agjan lidnad
Bolhov | Dmitrovsk | Livni | Maloarhangel'sk | Mcensk | Novosil' | Orel