Livni

Vikipedii
Mine navigeerimisribale Mine otsikasti
Livni
Ливны
 Lidnanznam
Coat of arms of Livny.svg
 Flag
Flag of Livny.svg
Valdkund Venäma
Eläjiden lugu (2018-01-01) 47 221 ristitud
Pind 32,1 km²
Livni Ливны
Pämez' Sergei Trubicin
(uhoku 2 018—)
Telefonkod +7-48 677-xx-xxx
Avtokod 57
Aigvö UTC+3 (MSK+0)


Livni (ven.: Ли́вны) om Venäman lidn da lidnümbrik Orelan agjan suvipäivnouzmas. Se om agjan kahtenz' lidn eläjiden lugun mödhe, om Livnin rajonan administrativižeks keskuseks, ei mülü sihe.

Istorii[redaktiruida | redaktiruida purde]

Edeline eländpunkt mainitase ezmäižen kerdan vl 1177 kuti järgeline varmitadud žilo, arheologad nimitihe sidä Klüčevk-lidneihut. Kaivandused sijadasoiš 4 km pohjoižhe lidnaspäi, niiden kaikiš amuižembad kul'turšoidud datiruišoiš 3.-2. voz'tuhal EME. Žilo oli Livnin ruhtinazkundan keskuseks, alištui Räzanin tobmudele. Om pandud mantazole i okaidud 13. voz'sadal Batijan matkan aigan.

Nügüdläižen eländpunktan aluz om pandud severz'-se kilometrid suvhe edeližespäi kuti lidn da lidnuz Venäman suviröunal vl 1586 Födor I Čudokaz-carin käskön mödhe, ühtel aigal Voronežanke sen varalidnuseks Moskvannoks čuradusel. Nimitihe vanhan lidneihuden tahondan mödhe Pöudlivni- i Meclivni-jogiden ühthejoksmusenno. Livni sai makundan lidnan statusad vl 1778. Šingotihe tal'jankoiden tehmižel i padanikoiden pramozlal edel Oktäbrin revolücijad. Toižen mail'man sodan aigan Livni oli okkupiruidud nacistoil (25. kül'mku — 7. tal'vku 1941), sid' alištui bombardiruindoile, i lidnan tobj pala oli muretud.

Livni šingotase mašinansauvomižen tegimil (pompad, fil'trad, lämoipalonvastaižed ladlused, kivivoibazoiden mašiništ i benzintäutmed), elektrotegesiden i lämuzpidatimiden tegimel, sömtegimištol (konditerine fabrik).

Geografijan andmused[redaktiruida | redaktiruida purde]

Lidn sijadase kesked rajonad, Hered Sosn-jogen hural randal tobjimalaz (ven.: Быстрая Сосна, vai muite Сосна, 296 km pitte, Donan üläjoksmusen oiged ližajogi), 126..191 m korktusil, 150 m ü.m.t. keskmäižel korktusel. Livenk-jogi (ven. Ливенка 32 km pitte) läbitab lidnad i lankteb Sosnaha sen suves. Matkad Orelhasai om 120 km lodeheze orhal, 140 km avtotel vai 154 km raudtel. Toine lähembaine lidn om Jelec (Lipeckan agj) 63 km päivnouzmha-pohjoižpäivnouzmha orhal, 74 km avtotedme vai 164 km raudtedme. «Orel — Lipeck»-avtotekeskust ümbärdab lidnad pohjoižespäi i päivnouzmaspäi. Livni I- (keskuses) i Livni II- (suvipäivlaskmaižel röunal) raudtestancijad ratas «Verhovje — Marmiži»-keskustal.

Livni om lidnümbrikon üks'jäine eländpunkt. Lidnümbrikon pind — 32,1 km².

Eläjad[redaktiruida | redaktiruida purde]

Vl 1897 lidnan ristitišt oli 20 400 eläjad, vl 1939 — 11 982 eläjad. Vn 2010 Venäman rahvahanlugemižen mödhe lidnan eläjiden lugu oli 50 343 ristitud. Kaikiš suremb lidnan ristitišt oli 50..53 tuhad eläjid vll 1986−2011 (53 800 rist. vl 2000). Ortodoksižen hristanuskondan ph. Sergii Radonežalaižen päjumalanpert' (1692), seičeme jumalanpertid i kaks' časounäd[1] oma olmas lidnas, mugažo protestantizman koume pühäpertid (baptizman kaks' i seičemenden päivän adventistoiden jumalankodikundan üks').

Rahvahad (2010): venälaižed — 98,0%, toižed rahvahad — 2,0%.

Professionaližen opendusen aluzkundad oma Livnin sauvondtehnikum[2] i Orelan valdkundaližen universitetan Livnin filial.

Galerei[redaktiruida | redaktiruida purde]

Homaičendad[redaktiruida | redaktiruida purde]

  1. Livnin pühäpertid sobory.ru-saital. (ven.)
  2. Livnin sauvondtehnikuman sait (lst-liv.ucoz.ru). (ven.)
  3. «Prompribor»-tegimiden portal (prompribor.ru). (ven.)

Irdkosketused[redaktiruida | redaktiruida purde]



Orelan agjan lidnad
Bolhov | Dmitrovsk | Livni | Maloarhangel'sk | Mcensk | Novosil' | Orel