Palačjaugaižed

Palačjaugaižed
Palačjaugaižiden erazvuiččend
Tedoklassifikacii
Valdkund: Živatad Tip: Palačjaugaižed
Latinankel'ne nimi
Arthropoda Siebold, 1848
Sistematik Vikierikoiš Kuvad Vikiaitas ITIS 82696 NCBI 6656

Palačjaugaižed (latin.: Arthropoda) oma meren i kuivman živatoiden tip.

Etimologii

Latinankel'ne nimi libui grekan kelen sanoišpäi: amuižgrek.: ἄρθρον artron «niveleh» i amuižgrek.: πούς-sanan genitiv ποδός podos «jaug».

Leviganduz

Živatoiden ümbrikirjutadud erikoiden keskes kaikiš paksumbad oma palačjaugaižed (enamba 1,3 mln erikoid, 78 %). Palačjaugaižiden erikoiden todesine lugu voib sadas 10..30 millionhasai.

Tipan ezmäižed živatad sünduiba edel kembrijad läz 550 mln vozid tagaz vai kembrijan aigan, läksiba kuivmale. Ezimeletadud ühthine ezitat sötlihe vezišton pohjan sadegil. Palačjaugaižiden erikod elänzoittas läz kaikid ümbrištoid i valatoittas niid: valdmeri, reskveded, kuivma, makarad igähižen lumen jonohosai, letas atmosferas kilometrhasai kortte.

Ümbrikirjutand

Palačjaugaižiden hibj om segmentiruidud, kogoneb tagmoišpäi. Hibj om kattud täuzin hitinanmülüjal kutikulal, siš om vahvembid keskustoid (skleritoid) i notkid membranoid. Kazdas verendan aigan vaiše. Rakanvuiččiden skelet mülütab äi kal'cijan karbonatad (CaCO₃). Kaik vai erased lopused oma palakahad, niil om likundan, hengindan, kaičendan i tabadandan funkcijoid. Sömänsulatuzsistem om differenciruidud, söte henotase südäikohtas.

Elädas üks'päin tobjimalaz. Erased gavedid ozutadas socialižusen korktad tazopindad.

Alatipad

• Helicerižed (Chelicerata, niiden kesken hämähoukunvuiččed)
• Rakanvuiččed (Crustacea)
• Tracheata (mülütadas gavedid)
• †Trilobitanvuiččed (Trilobitomorpha)

Znamoičend

Palačjaugaižed oma sötkeks živatoiden toižiden erikoiden täht, ühtnedas mahusensädandha i organižiden substancijoiden londuseližhe pörundha, pölüstoittas kazmusid, mugažo levitadas tartläžundoid i todas pahut maižanduzkul'turoile.

Ristitud ottas rakoid sötkeks. Mezjäižed i šuukun Bombyx mori-lipkaine oma ičevuiččikš maižanduzživatoikš.