Rahov

Rahov
Рáхів
Lidnanznam;	Flag;
Valdkund	Ukrain
Eläjiden lugu (2022)	15,536 ristitud
Pind	52,42 km²
Telefonkod	+380−3132
Aigvö	tal'vel UTC+2,; kezal UTC+3

Rahov (ukr.: Рáхів [rahiv], mad'j.: Rahó, rom.: Rahău) om Ukrainan lidn Karpatantagaižen agjan suvipäivnouzmas. Se om Rahovan rajonan administrativižeks keskuseks da palaks, valdkundan kaikiš korktemb sijatud lidn.

Istorii

Nügüdläižen eländpunktan aluz om pandud vl 1447. Raudte tuli žilho vn 1895 elokus. Kätihe žilod lidnanvuiččeks vl 1947, se sai lidnan statusad vl 1958.

Nevondkundaližen aigan Rahov šingotihe mecanümbriradmižen kombinatal, kartonfabrikal, mebel'fabrikal, voitegimel, «Kondensator»-tegimel i turizmal (turistoiden baz). Nügüd'aigan torguindbaz radab.

Geografijan andmused

Lidnan sijaduz rajonas i agjas vn 2017 kartal

Lidn sijadase rajonan keskuzpalan suves, Karpatoiden suvipautkil, 400..1200 m korktusil, 430 m ü.m.t. keskmäižel korktusel. Tis-jogi (ukr.: Ти́са, Dunain hura ližajogi) ristikoičeb kaiked lidnad pohjoižpäivnouzmaspäi suvipäivlaskmha, Rahov om ezmäižeks lidnaks jogen mödvedhe.

Matkad Užgorodhasai om 209 km avtoteidme päivlaskmha-lodeheze vai 222 km raudtel (oiktad raudteühtenzoitust nügüd' ei ole). «Užgorod — Ivano-Frankovsk»-avtote läbitab lidnad. Matkad Romanijan röunhasai om kaks'kümne kilometrad suvhe i suvipäivlaskmha orhal, rahvahidenkeskeine Rahov-kontrol'punkt radab raudtel valdkundröunanno.

Eläjad

Vn 2011 Ukrainan rahvahanlugemižen mödhe lidnan eläjiden lugu oli 15 137 ristitud, vn 2022 — 15 536 ristitud, rajonan videndez. Kaik 15 489 eläjad oli lidnas vl 2017.

Rahvahad (2001): ukrainalaižed — 89,88 %, mad'jaralaižed — 6,93 %, venänikad — 2,12 %, čiganalaižed — 0,36 %, vaugedvenälaižed — 0,11 %, saksalaižed — 0,11 %, toižed rahvahad i rahvahuden ozutandata — 0,49 %.

Kodikelen mödhe (2001): ukrainan kel' — 92,08 %, mad'jaran kel' — 4,80 %, venän kel' — 2,29 %, čiganan kel' — 0,44 %, toižed keled i kodikelen ozutandata — 0,39 %.