Reboinnena

Reboinnena
Лисий Нос
Lidnanznam;	Flag;
Valdkund	Venäma
Eläjiden lugu (2020)	4,663 ristitud
Pind	8,53 km²
Telefonkod	+7−812-xxx-xxxx
Avtokod	78, 98, 178, 198
Aigvö	UTC+3 (MSK+0)

Reboinnena (ven.: Лисий Нос (Lisii Nos), suom.: Revonnenä) om Venäman radinžilo i municipaline ühtnik Piterin Merenrandaižes rajonas. Sijadase Suomen lahten randal.

Istorii

Küläeländpunkt mainitase Vodin pätinan aigkirjas vl 1500 kuti Reboinžilo Korinannemel (ven.: село Лисичье в Корине носу). 17. voz'sadal tahond oli Ročinman tobmuden al.

Nügüdläižen eländpunktan aluz om pandud vl 1854 kuti redut azegidenke da žilo senno kaičemha Piterid Anglijan laivištod vaste. Sai radnikžilon statusad vn 1948 sulakus, alištadihe Leningradan tobmudele vn 1950 21. päiväl keväz'kud.

Geografijan andmused

Sestroreck-lidnan rajonad levigatas pohjoižhe žilospäi.

Meriveden keskmäine lämuz om +18..+20 C° kezakus-elokus, no absolütine voib olda i +10 C°, i +30 C° niil kuil.

Eläjad

Vn 2010 Venäman rahvahanlugemižen mödhe žilon eläjiden lugu oli 4 759 ristitud, vn 2002 — 2 563 ristitud. Kaikiš suremb radinžilon eläjiden lugu oli 5 032 ristitud vl 2015.

Transport

Piterin ümbärten nolänz' kilometr sijadase žilos. Reboinnena-žilo ühtenzoitase läbiajajil avtobusmaršrutoil lähižidenke lidnoidenke (Sestroreck, Zelenogorsk, Kronštadt) i metropolitenan erazvuiččiden linijoiden koumenke stancijanke («Begovaja», «Staraja Derevnä», «Čornaja rečka»).

Ühtennimine raudtestancii radab žilos vspäi 1894. Edel 1928. vot sen nimi oli Razdel'nai (ven.: Раздельная), i Reboinena-nimi oli toižel stancijal (1894−1928), sarakol Razdel'najaspäi, no tühjitihe sarakod i stancijad vl 1928 i anttihe nimed nügüdläižele stancijale.

Irdkosketused

Reboinnena Vikiaitas