San Huan (lidn, Puerto Riko)

San Huan
San Juan Bautista (isp.)
San Juan (angl.)

Lidnanznam	Flag
Valdkund	Amerikan Ühtenzoittud Valdkundad
Eläjiden lugu (2010)	395,326 ristitud
Pind	199,2 km²
Pämez'	Karmen Julin Kruz Soto (2013—)
Telefonkod	+1−787, 939
Aigvö	UTC−4

San Huan (isp.: San Juan Bautista, San Juan [saŋ ˈxwan] «Joann-valatoitai», angl.: San Juan [ˌsæn ˈhwɑːn]) om AÜV:oiden Puerto Riko-territorijan pälidn, sen kaikiš suremb lidn. Vl 2010 läz 2,3 mln ristituid elädas lidnan aglomeracijas. San Juan om konurbacijas Karolinanke päivnouzmas, Kaguasanke suves da Gvainabonke päivlaskmas.

Lidn om Puerto Rikon tegimišton, rahaazjoiden da turizman päkeskuz.

Istorii

Vl 1521 ispanižed kolonizirujad paniba lidnan alust, eziauguižikš Ciudad de Puerto Rico-nimenke («sal'hekahan portan lidn»). Se om kahtenz' lidn Amerikas aigan mödhe, kudamban alust evropalaižed paniba, Santo Domingon jäl'ghe. Ujuden vedihe kuldad da hobedad portan kal't.

Vspäi 1898 San Huan kändihe amerikaižeks lidnaks Ispaniž-Amerikaižen sodan jäl'ghe.

Geografijan andmused

San Huan sijadase Puerto Riko-saren pohjoižel randal. Lidnan pind om 199 km², sidä kesken ma otab 124 km², vezi — 75 km² (37,8%). San Huan seižub Atlantižen valdmeren randal 8 metrad ü.m.t. keskmäižel korktusel. Ühtennimine merilaht da kaks' lagunad (Kondado da San Hose) oma olmas lidnas.

Klimat om meren tropine, räk da neps. Keskmäine lämuz om +25..+28 C° vodes läbi. Paneb sadegid 1434 mm vodes, kaikiš kuiv pord om uhoku-keväz'ku (111 mm kaikes pordos), kaikiš märgad oma semendku da kül'mku (150..160 mm kus).

San Huan alajagase 18 administrativižeks ümbrikoks (isp. barrio, angl. district).

Transport

Avtobusad, ehtatimed da kebnmetro oma kundaližeks transportaks lidnan südäimes.

Rahvahidenkeskeine soda- da civiline «Luis Munjos Marin»-lendimport (SJU) sijadase 13 kilometras suvipäivnouzmha lidnan amuižes keskusespäi. Sišpäi tehtas reisid AÜV:oihe, Kariban meren toižihe sarihe, Suviamerikan pohjoižhe, Kanadha da Päivlaskmaižen Evropan maihe.

Irdkosketused

• San Juan Ciudad Patria — San Huan-lidnan ohjastusen oficialine sait (sanjuan.pr). (isp.) (angl.)