Sapsan (elektrojonuz)

«Sapsan»-jonuz ozutezlikundan aigan vn 2009 kezal, «Moskv — Piter»-jono

«Sapsan» (ven.: «Сапсан») om elektrojonuz kiruhühtenzoitusen täht. Om tehtud Siemens-kompanijal Venäman täht.

Jonuz om nimitadud Falco peregrinus-kotkan venän nimitusel. Tehmine mäneb Venämas. Jonusen ventiläcii voib rata −50 C° lämudel. Kävutase levedal raižul. Kümne vagonad mülütadas 604 passažirad. Kaikiš lujemb časpiguz om röunatud 250 kilometral.

Vspäi 2009 tal'vkun 18. päiväspäi ajab «Moskv (Leningradan päraudtestancii) — Piter (Moskvan päraudtestancii)»-linijadme, aig matkas — 3 časud 45 minutad. Om kümne vai kaks'kümne vagonad jonuses. Vn 2015 kezakuhusai ajoi mugažo «Moskv — Alauz'lidn»-linijadme (aig matkas — 3 časud 55 minutad).

Istorii

Sapsan-elektrojonusen maršrutad (interaktivine kart)

Vn 2005 11. päiväl sulakud Venäman Vladimir Putin-prezidentan da Saksanman Gerhard Šröder-kancleran olendan aigan Venäman raudteiden pämehed Gennadii Fadejev da Siemens Hans Šabert allekirjutiba kožundkirjutesen 60 elektrojonusen ühthižes kehitoitandas da tehmižes Intercity-Express-bazal, likundan kaikiš lujemb piguz om 300 km/čas; necen kontraktan suruz oli 1,5 mlrd evroid. Tariž oli pästta jonusid Venämaha specialižesti sätud ühthižes edheotandas.

No Venäman «RŽD»-kompanijan prezidentan Vladimir Jakuninan tulendan jäl'ghe projektan parametrad vajehtihe lujas, märhapanihe lopuks vn 2006 semendkule: osttud jonusiden lugu poleni vaiše kahesahe, sil-žo aigal kontraktan summ poleni 600 mln evrohasai. Mugažo ei olend paginad tehmižes Venämas.

Sol'mitud kontrakt ezimeleti kožundkirjutest kahesan Velaro-üläkiruhjonusen taričendas vn 2010 lophusai, mugažo niiden tehnižes holituses 30 vot vai ajamha ei vähemb mi 14 mln km. Tarbhaičendan kontraktan maksarv oli 276 mln evrod, tehnižen holitusen — 354,1 mln evrod ližaks (kiruhlikundan organizacijan ühthine maksarv Moskvan i Piterin keskes oli, kut varasti, enamba 700 mln evrod). Siemens-jonused pidiba vajehtada vanhtunuzid ER200-kiruhjonusid, kudambad ratas «Piter — Moskv»-keskustal vspäi 1984. Edesižes planiruihe kiruhjonusiden likundan organizacijad Alauz'lidnan, Kazanin, sid' Samaran, Sočin i Kurskan čuradusihe, perspektivas Novosibirskan, Krasnojarskan i Omskan keskes. Šingotihe kiruhühtenzoitusen voimusel Kijevhasai, Minskhasai, Krimhasai i Adlerhasai (Har'kovan kal't).

Kontraktan mödhe tariž oli tarita nenid jonusiden toižendoid:

üks'sistemine jonuz kaikenaigaižel joksusel 3 kV painudel (B1-versii) kävutamha «Piter — Moskv»-keskustal;

Kaks'sistemine jonuz (kaks'palaine) kaikenaigaižel joksusel 3 kV painudel i vajehtujal joksusel 25 kV painudel 50 Hc paksudel (B2) kävutamha «Piter — Moskv — Alauz'lidn»-keskustal.

Japonine metallurgine «Nippon Steel»-kompanii tariči rel'soid 20..15 tuh.

Necen čuradusen ohjandamižen täht RŽD:as om tehtud specializiruidud filial – Kiruhühtenzoitusen direkcii, mitte pidab tehta radoid kiruhühtenzoitusen zavodindan täht Moskvan da Alauz'lidnan, Piterin da Hel'sinkin keskes, mugažo likundan piguziden ližadusen täht jo rados olijoil čuradusil.

Vn 2009 30. päiväl heinkud «Sapsan» tegi ezmäižen täuden demonstracijan matkan Moskvaspäi Piterihe. Regulärine ühtenzoituz necil jonol radaškanzi vn 2009 17. päiväl tal'vkud.

Vn 2011 tal'vkus «RŽD»-OJSC tegi «Simensale» käskön völ kahesale «Velaro RUS»-jonusele («Sapsan») läz 600 mln evrod ühthiženke arvonke (tehnižen holitusenke). Uden partijan ezmäine jonuz tuli Venämaha vn 2013 3. päiväl tal'vkud, jäl'gmäine — vn 2014 lophusai. Uziden jonusiden eriližuz om kaks'jonusiden sädandan voimuz äjiden ühtnikoiden sisteman mödhe, se laskeb ližata vedandmahtust ližamata jonusiden puruiden lugud.

Homaičendad

Nece kirjutuz om vaiše ezitegez. Tö voit abutada meile, ku kohendat sidä da ližadat sihe.