Sjudad Guajan

Sjudad Guajan
Ciudad Guayana
	Lidnanznam;
Valdkund	Venesuel
Eläjiden lugu (2021)	820,780 ristitud
Pind	560 km²
Pämez'	Janni Alonso; (mandat 2025−2029,; Yanny Alonzo Vivas)
Telefonkod	+58−286
Aigvö	UTC−4

Sjudad Guajan (isp.: Ciudad Guayana [sjuˈðað ɣwaˈʝana] «Guajan-lidn») om Venesuelan kudenz' lidn eläjiden lugun mödhe. Se om Bolivar-štatan kaikiš suremb lidn eläjiden lugun mödhe, Karoni-municipalitetan administrativine keskuz da päpala.

Istorii

Eländpunktan aluz om pandud kahten eländpunktan ühtištusel vn 1961 2. päiväl heinkud sauvomha järedad Guri-gidroelektrostancijad Karoni-jogel 70 km suvhe lidnaspäi. Nece GES pästab valdkundan elektrusen enamba pol't, nellänz' surtte GES mail'mas (2018).

Kaks' alüminijantegint i raudan metallurgijan kompanii ratas lidnas.

Geografijan andmused

Lidn sijadase valdkundan päivnouzmas, štatan pohjoižröunanno, vedase nell'kümne kilometrad pidust' Orinoko-jogen oiktad (suvišt) randad, seižub sen kaikiš znamasižemban Karoni-ližajogen lanktendan sijas. Karoni läbitab lidnad suvespäi pohjoižhe i jagab kaks'haze: vanh San Feliks-lidn om päivnouzmas (San Félix, alusenpanend 1724), uz' planiruidud Puerto Ordaz ([ˈpweɾto oɾˈðas]) levitase päivlaskmas. Sjudad Guajan sijadase 13 m ü.m.t. keskmäižel korktusel. Matkad štatan administrativižhe Sjudad Bolivar-keskushesai om 110 km päivlaskmha Orinokon ülezjogen. Koumen lähižen štatan čogad oma läz lidnad: Ansoategi i Monagas (ani Orinokon vastrandal), Del'ta Amakuro (mödvedhe Orinokon oiktal randal).

Klimat om ekvatorialine. Kun keskmäine lämuz om +25..+29 C° vodes läbi. Ekstremumad oma +18 C° (läz joga kus) i +37 C° (keväz'ku, semendku). Il'man lämuz voib ületada +33 C° kaikuččes kus. Paneb sadegid 1419 mm vodes, vähemba uhokus (48 mm), vihmsezon oleskeleb kezakus-elokus (200..255 mm kus).

Tobmuz

Kaiken Karoni-municipalitetan (isp.: Municipio Caroní, alusenpanend 1817) pind om 1612 nellikkilometrad.

Municipaližen ühtnikan tobmuden pämez' om alkal'd (Alcalde del Municipio Caroní), valičese radnikusele nelläs vodeks, voib valitas tošti. Edeližed alkal'dad oma Tito Ovjedo (Tito José Oviedo, 2016−2025), Hose Ramon Lopes (José Ramón López, 2008−2016).