Slupsk

Slupsk
Słupsk
Lidnanznam;	Flag;
Valdkund	Pol'šanma
Eläjiden lugu (2021)	88,835 ristitud
Pind	52,7 km²
Pämez'	Kristina Danilecka-Vojevodzka; (kül'mku 2018—,; Krystyna Danilecka-Wojewódzka)
Telefonkod	+48−59
Aigvö	tal'vel UTC+1,; kezal UTC+2

Slupsk (pol'š.: Słupsk [swupsk], kašuban kelel: Stôłpsk [stɞwpsk], edel 1945. vot oficialine nimi oli Štol'p , saks.: Stolp [ʃtɔlp]) om lidn Pol'šanman pohjoižes, mülüb Pomorjen sodaveikundha.

Istorii

Eländpunkt mainitase ezmäižel kerdal 10. voz'sadal. Se om lidnan oiktusidenke vozišpäi 1265 da 1310, konz sirtihe lidnad udhe sijha. Amerikaižen raketanvastaižen kompleksan sauvomine tuli lophu vodele 2018 vides kilometras päivnouzmha Slupskaspäi Redzikovo-žilos.

Slupsk šingotase Scania-avtobusoiden tehmižel, sobiden da kengiden pästandal, turizmal (14.-15. voz'sadoiden sauvused).

Geografijan andmused

Lidn sijadase sodaveikundan lodehes, Slup'-jogen randoil (pol'š.: Słupia), kahesatoštkümnes kilometras Baltijan meren randaspäi, 22 m ü.m.t. keskmäižel korktusel. Läz kaks'kümned vezištod lidnan territorijal oma Slupin johtad. Slupskan avanport om pen' Ustk-lidn (pol'š. Ustka).

Lähembaižed sured lidnad da järedad meriportad oma Gdan'sk (sodaveikundan keskuz) i Gdin', molembad sijadasoiš sadas kilometras päivnouzmha.

Klimat om ven meren. Keza om päivoikaz lujas, tal'vaig om pil'vekaz lujas. Voden keskmäine lämuz om +7,5 C°, kezakun-elokun +15,6..+16,8 C°, tal'vkun-keväz'kun −1,8..+1,0 C°. Ekstremumad oma −31,2 C° (viluku) i +36,0 C° (heinku). Kezaaigan minimum om −0,6 C° (kezaku, sügüz'ku), tal'vaigan maksimum om +18,1 C° (uhoku). Ei voi panda halad heinkus-elokus vaiše (elokun minimum om +2,8 C°). Paneb sadegid 771 mm vodes, enamba heinkus-elokus (85..99 mm kus), vähemba uhokus-sulakus (39..47 mm kus). Kun keskmäine relätivine nepsuz vajehtase 76..82 % röunoiš keväz'kus-elokus, 84..87 % sügüz'kus-uhokus.

Tobmuz

Slupsk jagase koumetoštkümneks nimitadud rajonaks administrativižeta statusata.

Lidnan tobmuden pämez' om prezident (pol'š.: prezydent Słupska). Edeližed lidnan pämehed oma Robert Bedron' (Robert Biedroń, tal'vku 2014 — kül'mku 2018), Macei Kobilin'ski (Maciej Kobyliński, 2002 — tal'vku 2014).

Eläjad

Vl 2014 lidnan eläjiden lugu oli 93,706 ristitud. Kaik 91,935 eläjad oli lidnas vl 2018. Kaikiš suremb lidnan ristitišt oli 102,832 eläjad vl 1994. Vn 1939 eläjiden lugu (50,373 rist.) ületi vodele 1960.

Üläopendusen viž aluzkundad ratas lidnas. Pomorjen universitet Slupskas^[1] (edel vn 2023 kezakud Pomorjen akademii, 3,5 tuh. üläopenikoid vn 2023 lopus) baziruiše lidnas, sen alusenpanend tegihe vl 1969 kut pedagogine tehnikum vn 1957 pedkolkedžaspäi, oli akademijaks vspäi 2000. Toižed aluzkundad oma policijan akademii, Ganzan administracijan üläškol, Ižandusen inženerijan üläškol, Varšavan Tehnikan da ekonomikan üläškolan informatikan da keliden keskuz.

Galerei

Lidnan tobmuden sauvuz (ratusz, semendku 2023)
Jumalanmaman Pühän Rozarijan jumalanpert' (katoline, 14. voz'sada), nägu vn 2023 semendkus
Pomorjen universitet Slupskas (sügüz'ku 2014, enččes gusaroiden polkan kazarm)
Slupsk-päraudtestancijan perron vn 2013 keväz'kus i počtamt senno