Jalutorovsk

Jalutorovsk
Ялуторовск

Lidnanznam	Flag
Valdkund	Venäma
Eläjiden lugu (2017)	39,837 ristitud
Pind	51,91 km²
Pämez'	Väčeslav Smelik (sulaku 2014—)
Telefonkod	+7−34 535-xx-xxx
Avtokod	72
Aigvö	UTC+5 (MSK+2)

Jalutorovsk (ven.: Ялу́торовск) om lidn da lidnümbrik Tümenin agjan suvipäivnouzmas. Se om federacijan subjektan nellänz' lidn eläjiden lugun mödhe, Jalutorovskan rajonan administrativižeks keskuseks mugažo, ei mülü sihe.

Istorii

Nügüdläižen eländpunktan aluz om pandud vl 1659 kuti Jalutorovskii-lidnuz da Jalutorovskai-slabad totarlaižiden Javlu-tur-lidneihuden sijas, se oli tetab 14. voz'sadaspäi. Vl 1782 sai makundan lidnan statusad. Oli kükstud dekabristoiden eländsijaks.

Sibirin trakt läbiti lidnad 19. voz'sadan ezmäižel polel, i se kändihe tegimišton keskuseks 19. voz'sadan lopus. Vn 1912 semendkus ezmäine jonuz tuli lidnha Tümenišpäi.

Jalutorovsk šingotase sömtegimištol (Danone-firman maidkombinat, lihakombinat, leibänproduktoiden kombinat), sauvondmaterialiden edheotandoil (metalližtorviden tegim, betonan pästand), valamižtegimel i mebel'fabrikal.

Geografijan andmused

Lidn sijadase Tobol-jogen hural randpolel (Irtišan hura ližajogi), 65 metrad ü.m.t. keskmäižel korktusel. Om maižandusen rajonan keskuseks. Matkad Tümenihesai om 73 km lodeheze orhal, 85 km avtotedme vai Transsib-raudtedme. Lähembaine lidn om Zavodoukovsk 21 km suvipäivnouzmha orhal, 26 km avtotedme vai raudtedme. «Tümen' — Omsk»-trass (R-402) om lidnan suviröunaks.

Jalutorovsk om lidnümbrikon üks'jäine eländpunkt.

Eläjad

Vn 2010 Venäman rahvahanlugemižen mödhe eläjiden lugu oli 36 493 ristitud. Kaikiš suremb ristitišt om nügüd'. Ortodoksižen hristanuskondan Jumalan Sreten'jan päjumalanpert' (udessündutihe vll 2006−2010) i Emäganpäivän da ph. Mikulain jumalanpert' oma olmas lidnas.

Rahvahad (2010): venälaižed — 88,7%, totarlaižed — 6,5%, ukrainalaižed — 1,0%, toižed rahvahad — 3,8%.

Irdkosketused

• Lidnan tobmuden aluzkundoiden oficialine sait (yalutorovsk.admtyumen.ru). (ven.)