Zavodoukovsk

Zavodoukovsk
Заводоуковск
Lidnanznam;	Flag;
Valdkund	Venäma
Eläjiden lugu (2021)	27,100 ristitud
Pind	20,96 km²
Pämez'	Svetlana Kasenova; (reduku 2020—)
Telefonkod	+7−34 542-xx-xxx
Avtokod	72
Aigvö	UTC+5 (MSK+2)

Zavodoukovsk (ven.: Заводоуко́вск) om Venäman lidn Tümenin agjan suvipäivlaskmas. Se om Zavodoukovskan lidnümbrikon (edel 2005. vot rajonan) administrativine keskuz da pala.

Istorii

Eländpunktan aluz om pandud vl 1729 kuti Ukovskai-külä (ven.: деревня Уковская). Vintegim radoi, i vl 1787 udesnimitihe Zavodoukovskoje-žiloks läz kaks' tuhad ristitištonke. Vspäi 1913 regulärine likund zavodihe Transsiban pohjoižsarakodme, Zavodoukovskai-raudtestancii om olmas. Vn 1939 kül'mkus kätihe radnikžiloks, mülüi Jalutorovskan rajonha. Vn 1960 26. päiväl sulakud Zavodoukovskoje-žilo sai lidnan statusad, ühtištadihe lähižidenke külidenke.

Vspäi 1963 lidn oli alištunu Jalutorovskan nevondkundale. Vspäi 1965 Zavodoukovsk oli ühtennimižen rajonan keskuseks, kätihe rajonad lidnanke lidnümbrikoks vl 2005.

Zavodoukovsk šingotase plastikan i polimeriden tegimel, mašiništonsauvomižen tegimel^[1] (treilerad, moduližed pertid, varapalad kivivoin da gazan tegimišton täht), sömtegimištol (lihakombinat i konditerine fabrik), sauvondmaterialiden kombinatal (raudbeton, gazbetonblokad, silikatine savič), mebel'fabrikal, plastikverkon tegimel maploduiden täht i omblendedheotandal.

Geografijan andmused

Lidn sijadase ümbrikon keskuzpalan päivlaskmas, penen Uk-jogen randoil (ven.: Ук 55 km pitte, Tobolan oiged ližajogi), 75 metrad ü.m.t. keskmäižel korktusel.

Matkad Tümenihesai om ühesakümne nell' kilometrad lodeheze orhal, 103 km avtotedme vai Transsib-raudtedme. Lähembaine lidn om Jalutorovsk kaks'kümnes ühtes kilometras lodeheze orhal, 26 km avtotedme vai raudtedme. «Tümen' — Omsk»-trass (R-402) om lidnan pohjoižröunaks.

Tobmuz

Lidnümbrikon tobmuden pämez' om sen Administracijan pämez'. Edeline lidnümbrikon pämez' om Aleksandr Anohin (reduku 2011 — reduku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 25 647 ristitud, lidnümbrikon viž ühesandest, vn 2021 — 27 100 ristitud. Kaik 26 006 eläjad oli lidnas vl 2017. Kaikiš suremb lidnan ristitišt oli 25..26 tuh. eläjid vll 1989−2020 (26 800 rist. vl 1998) i om nügüd'.

Ortodoksižen hristanuskondan ph. Jurgii-vägestusenkandajan jumalanpert'^[2] om saudud lidnas vll 1993−2004.

Openduz

Lapsiden opendusen aluzkundad oma päivkodid, keskškolad.

Agrotehnologižen kolledžan^[3] (Jalutorovsk) Zavodoukovskan palakund om lidnan professionaližen opendusen aluzkundaks. Edel 2019. vot sen nimi oli Zavodoukovskan agrotehnikum.

Galerei

Lidnan keskuz (2019), Zavodoukovskan lidnümbrikon administracijan sauvuz om vauged rusttanke tagamal
Ph. Jurgii-vägestusenkandajan jumalanpert', vn 2005 nägu
Sovetskai-ird i villänpurnuiden sauvuz vl 2005
Telekommunikacijoiden i počtan sauvuz (2005)
Zavodoukovskai-raudtestancii vl 2011