Subotic

Subotic
Суботица / Subotica

Lidnanznam	Flag
Valdkund	Serbii
Eläjiden lugu (2022)	88,752 ristitud
Pind	164,33 km²
Pämez'	Stevan Bakič (eloku 2020—, Стеван Бакић)
Telefonkod	+381-
Aigvö	tal'vel UTC+1, kezal UTC+2

Lidnan kart (2012)

Subotic (serb.: Суботица / Subotica [sǔbotitsa], mad'j.: Szabadka [ˈsɒbɒtkɒ]) om lidn Serbijan pohjoižes, Mad'jaranman röunanno. Se om valdkundan kudenz' lidn eläjiden lugun mödhe, kaikiš pohjoižemb lidn. Vojevodinan kahtenz' surtte lidn, om sen Pohjoižbačkan ümbrikon administrativižeks keskuseks da palaks.

Istorii

Eländpunkt mainitase vspäi 1391 kuti Zabatka mad'jaran ohjandusen aigan. Transil'vanijan Janoš Pongrac-gercog Dengelegaspäi sauvoi lidnust vl 1470 (kadoi). Oli alištunu Osmanan imperijan tobmudele vll 1542−1686.

Lidn om valdkundröunanno i nügüdläiženke oficialiženke nimitusenke vspäi 1918, sijaližed serbalaižed kävutiba sidä 17. voz'sadaspäi.

Subotic šingotase mašinansauvomižel (vagonad, tulleigeneratorad), himižiden heretusiden tegimel, sömtegimištol (konditerine fabrik, maidtegim, alkogoližiden jomiden tegim), turizmal (enamba 17 festivalid vodes).

Geografijan andmused

Lidnümbrikon sijaduz valdkundas vn 2006 kartal

Lidn sijadase Keskdunain alangištos, 109 m ü.m.t. keskmäižel korktusel. Järv lähižes Palič-lidnudes andab alust lebuturizman täht.

Matkad Mad'jaranman röunhasai om kümne kilometrad pohjoižhe, agjan Novi Sad-keskushesai om 95 km suvhe orhal vai 104 km avtotedme.

Tobmuz

Lidnan fartalad (2013)

Kaik kahesatoštkümne žilod mülüdas kundha lidnan ližaks.

Lidnan tobmuden pämez' om serb.: градоначелник Суботице, valičese radnikusele nelläks vodeks. Edeližed lidnan pämehed oma Bogdan Laban (Богдан Лабан, kezaku 2016 — eloku 2020), Jeno Maglai (Јено Маглај, kül'mku 2013 — kezaku 2016).

Eläjad

Vn 2011 Serbijan rahvahanlugemižen mödhe lidnan eläjiden lugu oli 97 910 ristitud, ümbrikon kaks' koumandest, vn 2022 — 88 752 ristitud. Kaikiš suremb lidnan ristitišt oli enamba 99 tuhad eläjid vll 1981−2002 (99 840 rist. vl 1981). Ümbrikon pind — 1007,47 km², sen ristitišt oli 123 952 eläjad vl 2022.

Rahvahad (enamba 0,4 % vl 2011): mad'jaralaižed — 32,7 %, serbalaižed — 29,9 %, horvatijalaižed — 9,2 %, bunevcad — 8,7 %, jugoslavijalaižed — 2,6 %, čiganalaižed — 2,5 %, montenegrolaižed — 1,1 %, makedonijalaižed — 0,4 %, toižed rahvahad i rahvahuden ozutandata — 12,9 %.

Irdkosketused

• Lidnan oficialine sait (subotica.rs). (serb.) (mad'j.) (horv.) (angl.)