Tükalinsk

Tükalinsk
Тюкалинск
Lidnanznam;	Flag;
Valdkund	Venäma
Eläjiden lugu (2023)	9,732 ristitud
Pind	44,6 km²
Pämez'	Viktor Mitin; (reduku 2021—)
Telefonkod	+7−38 176-xx-xxx
Avtokod	55
Aigvö	UTC+6 (MSK+3)

Tükalinsk (ven.: Тюкали́нск) om Venäman lidn da lidnankund Omskan agjan päivlaskmas. Se om Tükalinskan rajonan administrativižeks keskuseks da palaks.

Istorii

Eländpunktan aluz om pandud vl 1759 kuti počtstancii. Vspäi 1763 se oli Tükal-slabadaks (ven.: слобода Тюкала) Sibirin traktal, anttihe nimed jogen mödhe. Vl 1823 slabad' sai lidnan statusad nügüdläiženke nimenke. 20. voz'sadan augotišespäi lidn kadoti endišt znamoičendad Transsibirižen raudten sauvondanke, se raudte mäneb sadas kilometrad suvhe i läbitab Omskad.

Tükalinskan edheotandad mülüdas sömtegimištho (leibtegim i voisagudkombinat). Mugažo šingotadas sapropelin ümbriradmine i turizman infrastruktur.

Geografijan andmused

Tükalinskan rajonan sijaduz agjas vn 2006 kartal

Lidn sijadase rajonan keskuzpalan suvipäivlaskmas, Išiman tazangišton päivnouzmas, Tükalk-jogen randal (ven.: Тюкалка / Тюкала 44 km pitte, Irtišan hurapol'ne bassein), 115 m ü.m.t. keskmäižel korktusel. Jogi läbitab Razliv-järved lidnan südäimes.

Matkad Omskan röunhasai om 124 km suvipäivnouzmha. Lähembaine lidn om Nazivajevsk seičemekümnes vides kilometras suvipäivlaskmha avtotedme.

Tobmuz

Tükalinsk om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeližed Administracijan pämehed oma Sergei Födorov (tal'vku 2018 — kezaku 2020), Viktor Vorotnikov (viluku 2017 — eloku 2018). Lidnan Nevondkundan ezimez' om Lüdmila Levočkina vspäi 2010.

Eläjad

Vl 1913 lidnan ristitišt oli 8 200 eläjad. Vn 2010 Venäman rahvahanlugemižen mödhe lidnan eläjiden lugu oli 11 275 ristitud i oti koumed seičemendest rajonan ristitištos, vn 2021 — 9 894 ristitud. Vl 2017 lidnan ristitišt oli 10 326 eläjad. Kaikiš suremb ristitišton lugu oli 12 600 eläjad vozil 1998−2000.

Ortodoksižen hristanuskondan Pühän Johann-endustajan Sündundpäivän jumalanpert'^[1] (kivine om saudud vl 1982) om avaitud lidnas. Eläban Eziauguižen Stroican jumalanpertin sauvuz om kaičenus, no lämoipalonvastaine palakund radab siš. Niiden ližaks ph. Mikoi-arhangelan jumalanpert' (kivine oli vspäi 1893) ei ole kaičenus ani, panihe mantazole nevondkundaližel aigal.

Openduz

Lapsiden opendusen aluzkundad oma severz'-se päivkodid, gimnazii, licei (edel 2011. vot keskškol nomer 1), čomamahtoiden škol, lapsiden da norišton keskuz.

Tükalinskan professionaline kolledž^[2] om lidnan professionaližen opendusen aluzkundaks.

Homaičendad

Irdkosketused

	Omskan agjan lidnad
	Isil'kul' \| Kalačinsk \| Nazivajevsk \| Omsk \| Tar \| Tükalinsk

[1] Tükalinskan pühäpertid sobory.ru-saital. (ven.)

[2] Tükalinskan professionaližen kolledžan sait (tkolledg.ucoz.ru). (ven.)

[1]

[2]