Kalačinsk

Kalačinsk
Калачинск
	Lidnanznam;
Valdkund	Venäma
Eläjiden lugu (2023)	20,825 ristitud
Pind	25,13 km²
Pämez'	Konstantin Gladkih; (keväz'ku 2024—)
Telefonkod	+7−38 155-xx-xxx
Avtokod	55
Aigvö	UTC+6 (MSK+3)

Kalačinsk (ven.: Кала́чинск) om Venäman lidn da lidnankund Omskan agjan päivlaskmas. Se om agjan koumanz' lidn eläjiden lugun mödhe (ühtes rives Isil'kulinke), Kalačinskan rajonan administrativine keskuz.

Istorii

Eländpunktan aluz om pandud vl 1794 kuti Kalačiki-külä vai Kalač. Vl 1896 saudihe Transsiban stancijad kahtes kilometras suvhe žilospäi, ühtištadihe niid aigan mändes. Vozil 1920−1925 žilo sai makundan lidnan statusad i nimitihe nügüdläižikš, sid' oli žiloks möst. Vn 1943 24. vilukud kätihe Kalačinskad radnikžiloks, vn 1952 27. päiväl kül'mkud — lidnaks tošti. Vspäi 1955 raudten distancii radab elektrižel vedandal.

Kalačinsk šingotase mehanižel tegimel (maižanduzazeged, katl'ad) i keramižen savičun tegimel, mugažo maidtegim, leibänkombinat i raudtedepo ratas lidnas.

Geografijan andmused

Lidn sijadase Om'-jogen (ven.: Омь, Irtišan oiged ližajogi) alajoksmusen hural randal tobjimalaz, 100 m ü.m.t. keskmäižel korktusel.

Matkad Omskan röunhasai om 65 km päivlaskmha raudtedme vai avtol. Toine lähembaine lidn om Tatarsk (Novosibirskan agj) 90 km päivnouzmha Transsibal vai avtotedme.

Tobmuz

Kalačinsk om lidnankundan üks'jäižeks eländpunktaks.

Lidnankundan pämez' om sen Nevondkundan ezimez'. Edeline lidnan pämez' om Aleksei Basov (kül'mku 2020 — keväz'ku 2024). Lidnan administracii om likvidiruidud vl 2015, rajonan administracii tegeb sen velgusidme.

Eläjad

Vn 2010 Venäman rahvahanlugemižen mödhe lidnan eläjiden lugu oli 23 556 ristitud, rajonan pol', vn 2021 — 21 378 ristitud. Kaik 22 781 eläjad oli lidnas vl 2017. Kaikiš suremb lidnan ristitišt oli 26 tuhad eläjid vl 1998.

Ortodoksižen hristanuskondan kaks' pühäpertid^[1] oma saudud da avaitud lidnas: Sündun Eläbzdusen kafedraline päjumalanpert' (om sätud vll 2001−2008) i ühtennimine jumalanpert' (letihe vll 1990−1995).

Lapsiden opendusen aluzkundad oma viž päivkodid (nomer 1..4, 7), gimnazii (nomer 1), licei, kaks' keskškolad (nomer 2 i 4), adaptivine škol-internat, čomamahtoine škol, lapsiden tervehtamižen i opendusen fizkul'turižsportivine keskuz. Kalačinskan agrariž-tehnine tehnikum^[2] om lidnan professionaližen opendusen aluzkundaks.

Galerei

Tobmuden pert' i stell časuidenke sen edes (2023)
Sündun Eläbzdusen kafedraline päjumalanpert', vn 2023 nägu
Memorialine sein Suren sodan pölištunuzile (2016)
Lidnan kodirandantedištandmuzei (2016, ende škol, P.E. Osminin-vägimez' openui siš)
Kalačinskai-päraudtestancijan sauvuz vl 2021