Tatarsk

Tatarsk
Татарск
Lidnanznam;	Flag;
Valdkund	Venäma
Eläjiden lugu (2021)	23,711 ristitud
Pind	80,09 km²
Pämez'	Aleksei Sivolapenko; (keväz'ku 2020—)
Telefonkod	+7−38 364-xx-xxx
Avtokod	54, 154
Aigvö	UTC+7 (MSK+4)

Tatarsk (ven.: Тата́рск) om Venäman lidn da lidnankund Novosibirskan agjan päivlaskmas. Se om Tatarskan rajonan administrativine keskuz.

Istorii

Eländpunktan aluz om pandud vl 1894 kuti Tatarskai-raudtestancii (ven.: Татарская) Stancionnii-žilonke senno sauvomha da holitamha Transsibad i sirdnikoiden Venäman imperijan evropižes palaspäi bazaks. Nimitihe lähižen Vanh Tatark-žilon mödhe (ven.: село Старая Татарка), se sijazihe kahtes virstas da oli pandud 18. voz'sadal. Ühtištadihe kaht žilod da anttihe lidnan statusad vn 1911 27. päiväl vilukud, vl 1925 se status oli vahvištadud. Vll 1912−1914 saudihe Kulundan magistralid suvipäivnouzmha vemha villäd ajaden, kätihe Tatarskad raudtesol'meks. Vn 1917 tal'vkus panihe lidnad uden Tatarskan makundan keskuseks, kätihe makundad rajonaks vn 1925 elokus.

Tatarsk šingotase raudten edheotandoil (vagonoiden kohenduzdepo, raudten distancii) i sömtegimištol (leibänkombinat, villänpurnud, kuivan maidon tegim).

Geografijan andmused

Lidn sijadase 105 m ü.m.t. keskmäižel korktusel.

Matkad Novosibirskhasai om 443 km päivnouzmha orhal, 473 km avtotedme vai raudtedme. Lähembaine lidn om Kalačinsk (Omskan agj) 90 km päivlaskmha Transsibal vai avtotedme. «Irtiš»-avtote (R-254) om lidnan suviröunaks.

Tobmuz

Tatarsk om lidnankundan üks'jäižeks eländpunktaks.

Edeline lidnan pämez' om Aleksandr Švedov (tal'vku 2005 — viluku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 24 217 ristitud, rajonan koume videndest, vn 2021 — 23 711 ristitud. Kaikiš suremb lidnan ristitišt oli 29..30 tuhad eläjid vll 1959−1998 (30 893 eläjad vl 1979).

Ortodoksižen hristanuskondan Jumalanmaman Katken jumalanpert'^[1] om saudud vll 1994−2001. Letihe islaman pühäpertid vspäi 2013, se om avaitud vn 2018 uhokus.

Lapsiden opendusen aluzkundad oma ühesa päivkodid (nomer 1, 2, 4..8, 10, 12), kuz' keskškolad (nomer 2..5, 9, 10), licei, aluzopendusen škol-internat, lapsiden sädamižen keskuz, čomamahtoiden škol, lapsiden da norišton sportškol. Tatarskan politehnine^[2] i pedagogine^[3] kolledžad oma lidnan professionaližen opendusen aluzkundoikš.

Galerei

Muštnik külätahondan radnikoile (2009), rajonan 80-voččele jubilejale
Jumalanmaman Katken jumalanpert', vn 2009 nägu
Puruvedim lidnan muzejas (2009)
Čuhunduz časuidenke Leninan irdal (2009)
Tatarskai-päraudtestancijan sauvuz vl 2021

Homaičendad

Irdkosketused

Lidnan tobmuden aluzkundoiden oficialine sait (admtatarsk.nso.ru). (ven.)

Tatarsk Vikiaitas

	Novosibirskan agjan lidnad
	Barabinsk \| Berdsk \| Bolotnoje \| Čerepanovo \| Čulim \| Iskitim \| Karasuk \| Kargat \| Kuibišev \| Kupino \| Novosibirsk \| Ob' \| Tatarsk \| Togučin

[1] Tatarskan pühäpertid sobory.ru-saital. (ven.)

[2] Tatarskan politehnižen kolledžan sait (tatpk.ru). (ven.)

[3] Tatarskan pedagogižen kolledžan sait (pedcollege-tatarsk.edusite.ru). (ven.)

[1]

[2]

[3]