Karasuk (lidn)

Karasuk
Карасук
Lidnanznam;	Flag;
Valdkund	Venäma
Eläjiden lugu (2021)	24,890 ristitud
Pind	30 km²
Telefonkod	+7−38 355-xx-xxx
Avtokod	54, 154
Aigvö	UTC+7 (MSK+4)

Karasuk (ven.: Карасу́к) om Venäman lidn da raudtesol'm Novosibirskan agjan suvipäivlaskmas. Se om Karasukan municipaližen ümbrikon (edel 2024. vot — rajonan) administrativižeks keskuseks da palaks.

Istorii

Eländpunktan aluz om pandud vl 1915 sauvomha da holitamha raudtesarakod Transsibaspäi, nimitihe jogen mödhe. Vl 1943 kätihe radnikžiloks. Se sai lidnan statusad vn 1954 3. päiväl kezakud.

Karasuk šingotase raudten edheotandoil (vedimiden kohenduzdepo) i sömtegimištol (lihakombinat, leibänkombinat, kalategim).

Geografijan andmused

Lidn sijadase ümbrikon keskuzpalas, Karasuk-jogen (531 km pitte) hural randal sen lanktendan tahondas vedhudetomihe järvihe, 110 m ü.m.t. keskmäižel korktusel. Pened solavad järved oma lidnan ümbrištos.

Matkad Altajan randhasai om kaks'kümne kilometrad suvhe orhal, Novosibirskhasai om 348 km pohjoižpäivnouzmha orhal vai 387 km avtotedme. Lähembaižed lidnad oma Slavgorod (Altajan rand) 92 km suvipäivnouzmha orhal, 106 km avtol vai raudtedme, i Kupino 85 km lodeheze orhal, 96 km avtotedme vai raudtel. Karasuk-1 i Karasuk-3 oma kaks' raudtestancijad lidnas, «Tatarsk — Ust' Kamenogorsk»- i «Omsk — Barnaul»-jonod ristikoičesoiš täs.

Tobmuz

Jarok-žilo (63 rist. vl 2017) mülüi lidnankundha Karasukan ližaks. Lidnankundan pind oli 32,71 km².

Viktor Baštanov radoi lidnankundan pämehen vn 2012 elokuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 28 586 ristitud, lidnankundan — 28 652 ristitud, rajonan koume videndest, vn 2021 lidnan — 24 890 ristitud. Kaik 27 196 eläjad oli lidnas vl 2017. Kaikiš suremb lidnan ristitišt oli 30 900 eläjad vll 1996 i 2000.

Ortodoksižen hristanuskondan koume pühäpertid^[1] oma saudud lidnas: ph. Ezikuctud Ondrii-apostolan kafedraline päjumalanpert' (2006), ph. Vladimiran jumalanpert' (uz', om saudud vll 2019−2020), ph. Sergii Radonežalaižen časoun' (letihe vodele 2016).

Openduz

Lapsiden opendusen aluzkundad oma ühesa nimitadud i nomeruidud päivkodid (nomer 1..3, 5..9, 31), aluzškol nomer 4, koume keskškolad (nomer 2, 3, 5), gimnazii nomer 1, tehnine licei nomer 176, lapsiden sädamižen keskuz, čomamahtoiden škol nomer 1, rajonan lapsiden da norišton sportškol.

Karasukan pedagogine kolledž^[2] om lidnan professionaližen opendusen aluzkundaks.

Galerei

Solav-järv (ven.: Озеро Солёное), nägu vn 2008 redukus
Praktik-lauk vl 2013
Karasuk-päraudtestancijan sauvuz vl 2023

Homaičendad

Irdkosketused

Karasukan municipaližen ümbrikon tobmuden sait (adm-karasuk.nso.ru). (ven.)

Karasuk (lidn) Vikiaitas

	Novosibirskan agjan lidnad
	Barabinsk \| Berdsk \| Bolotnoje \| Čerepanovo \| Čulim \| Iskitim \| Karasuk \| Kargat \| Kuibišev \| Kupino \| Novosibirsk \| Ob' \| Tatarsk \| Togučin

[1] Karasukan pühäpertid sobory.ru-saital. (ven.)

[2] Karasukan pedagogižen kolledžan sait (karasukpedcollege.ru). (ven.)

[1]

[2]