Mine sisu juurde

Vožeg

Vikipedii-späi
Vožeg
Вожега
Valdkund Venäma
Eläjiden lugu (2023) 6,015 ristitud
Vožeg Вожега
Telefonkod +7−81 744-xx-xxx
Avtokod 35
Aigvö UTC+3 (MSK+0)


Vožeg (ven.: Во́жега) om Venäman lidnanvuitte žilo Vologdan agjan pohjoižes. Se om Vožegan ümbrikon (edel vn 2022 kezakud — rajonan) administrativine keskuz (vspäi 1929) da kaikiš suremb eländpunkt.

Eländpunktan aluz om pandud vl 1895 kuti raudtestancii sauvomha «VologdArhangel'sk» raudtekeskust. Vn 1932 tal'vkun 10. päiväl radnikžilo sai lidnanvuiččen žilon statusad VCIK:an käskön mödhe.

Vožegan ižandusen päižed sarakod oma mecan varhapanend, mecan ümbriradmine pumaterialaks (pened edheotandad ratas senke), sauvond, leibtegim da adivpert' oma saudud. Ende Vožegan mehanine tegim (Vologdan optiž-mehanižen tegimen filial) radoi žilos mugažo.

Geografijan andmused

[vajehta | vajehtada lähtetekst]

Žilo sijadase ümbrikon keskuzpalas, kukhikahas tahondas, ühtennimižen jogen oiktal randpolel, kahtes kilometras sen randaspäi.

Matkad Vologdhasai om 141 kilometrad suvhe orhal, 177 km avtotedme. Lähembaine lidn om Harovsk 58 kilometrad suvhe orhal vai 72 km avtotedme.

Klimat om ven kontinentaline. Voden keskmäine lämuz om +2,4 C°, kezakun-elokun +13,8..+17,0 C°, tal'vkun-uhokun −9,4..−11,7 C°.

Vožegan lidnankund oli olmas vspäi 2006.

Lidnankundan pind oli 554,6 km²[1], 606 ristitud eliba 48 küläs Vožeg-žilon ližaks vl 2010.

Lidnankundan päkäskuz oli vahvištadud vn 2005 elokun 8. päiväl[2], se oli väges vajehtusidenke da ližadusidenke edel lidnakundan tühjitandhasai.

Nikolai Olenev oli valitud da radoi Vožegan lidnankundan pämehen vn 2013 sügüz'kuspäi, mugažo radoi rajonan suiman ezitajaks edel sidä. Administracijan varapämez' oli hänele abhu.

Kaik koume valičemižümbrikod oli lidnankundas (1 — nell' mandatad, 2 — koumin mandatoin). Kaik kümne ezitajad mülüiba lidnankundan Nevondkundha (ven.: Совет поселения). Valitihe heid järgenduseližen kerdan vn 2013 sügüz'kun 8. päiväl (koumanz' kucund)[3]. Heiden valdatusiden strok oli nell' vot. Anatolii Kekišev radoi sen ezimehen vspäi 2005 koumanden strokun jäl'geten[4]. Varapämez' oli hänele abhu.

Lidnankundan administracii kogoni 11 radnikaspäi vl 2015.

Vn 2002 Venäman rahvahanlugemižen mödhe žilon eläjiden lugu oli 6 835 ristitud, vl 2010 — 6 725 ristitud, vl 2021 — 6 119 ristitud. Kaik 6 156 eläjad oli žilos vl 2017. Kaikiš suremb žilon ristitišt oli 7 552 eläjad vl 1959 i 7 370 eläjad vl 1989.

Rahvahad (enamba 0,4 % vl 2021): venälaižed — 88,5 %, toižed rahvahad — 2,5 %, rahvahuden ozutandata — 9 %.

Ortodoksižen hristanuskondan ph. Illä-endustajan puine jumalanpert'[5] om saudud žilho vl 1995.

Nened büdžetižed aluzkundad oma žilos: kodirandantedištandmuzei, rajonan kul'turpert', lapsiden sädamižen pert', lapsiden i norišton sportškol, čomamahtoiden lapsidenškol, škol jumalankodinno, muzikškol, fizkul'turiž-tervehtamižkompleks da keskuzkirjištsistem. Opendusen aluzkund om keskškol, edel 2010. vot oli kaks' keskškolad.

Avtote ühtenzoitab žilod Vologdanke.

Ühtennimine Vožeg-raudtestancii sijadase žilon keskuzpalas.

  1. Общая площадь земель по муниципальным образованиям на 2015 год: Вологодская область (Maiden ühthine pind municipaližiden ühtnikoiden mödhe vl 2015: Vologdan agj). — Rosstat (gks.ru). (ven.)
  2. Устав Вожегодского городского поселения Вожегодского муниципального района (Vožegan lidnankundan päkäskuz, Vožegan municipaline rajon). — Base.garant.ru. (ven.)
  3. Выборы депутатов Совета Вожегодского городского поселения Вожегодского муниципального района (Vožeg-lidnankundan Nevondkundan ezitajiden valičendad, Vožegan municipaline rajon). — Tedod mänijoiš valičendoiš da referendumiš (vybory.izbirkom.ru) // Venälaižen Federacijan keskuzline valičemižlaudkund. (ven.)
  4. Городское поселение: о доходах, расходах и многом другом (Lidnankund: sal'hiš da mänetusiš i äjan toižen polhe) //Aktualižikš - 20.02.2016. — Bor'ba-rajonlehtez (borba35.ru). (ven.)
  5. Vožegan pühäpertid sobory.ru-saital. (ven.)