Harovsk

Harovsk
Харовск

Valdkund	Venäma
Eläjiden lugu (2017)	9 185 ristitud
Pind	10 km²
Pämez'	Vladimir Majorov (kül'mku 2 016 —)
Telefonkod	+7-81 732-xx-xxx
Avtokod	35
Aigvö	UTC+3 (MSK+0)

Harovsk (ven.: Харовск) om Venäman lidn da lidnankund Vologdan agjan keskuses. Se om Harovskan rajonan administrativine keskuz, sen üks'jäine lidn.

Istorii

Eländpunktan aluz om pandud vl 1903 kuti Harovskii-žilo sauvomha stöklantegint. Žilo Harovskai-raudtestancijanno (ven.: Харовская) zavodihe vspäi 1898 sauvomha stancijad i raudtesildad, sid' holitamha raudted. Vhesai 1904 nimitihe stancijad Kubino i vll 1904—1914 Leščovo. Vspäi 1933 ühtištuihe niid Harovsk-radnikžilho.

1930-nzil vozil sauvoihe äi edheotandoid: mecanümbriradai tegim, sömänkombinat, špaloiden imetusen tegim, ezitegesiden edheotand tehmaha muziksoitoid, leibänkombinat, maidtegim, pölvhantegim, optiž-mehanižen tegimen filial. Harovsk sai lidnan statusad vn 1954 28. päiväl redukud.

Geografijan andmused

Lidn sijadase Kuben-jogen hural randal tobjimalaz (ven.: Кубена, Kubenan järven bassein), kukhikahas tahondas, 120..180 m ü.m.t. korktusil. Matkad Vologdhasai om 84 km suvhe orhal vai 110 km avtotedme. Lähembaižed lidnad oma Sokol 55 km suvhe orhal vai 73 km avtotedme i Kadnikov 51 km suvhe orhal vai 90 km avtotedme.

Harovsk om lidnankundan üks'jäine eländpunkt.

Eläjad da ižanduz

Vn 2010 Venäman rahvahanlugemižen mödhe eläjiden lugu oli 10 079 ristitud, rajonan ristitišton koume videndest. Kaikiš suremb ristitišt oli vl 1992 — 13 200 ristitud. Ortodoksižen hristanuskondan kaks' pühäpertid om lidnas: ph. Sarovalaižen Serafiman jumalanpert' i ph. Katromalaižen Onufrijan jumalanpert'.

Ižandusen päsarakod oma mecan ümbriradmine i sömtegimišt, mugažo tehnologižen mašiništon tegim agrariž-tegimištoližen kompleksan täht radab. Sokolan mectegimištoližen tehnikuman filial om professionaližen opendusen aluzkundaks.

Avtobusad oma kundaližeks transportaks lidnas da sen ümbrištos. Ezilidnelektrojonused ajeltas Vologdhasai i Vožeg-žilhosai.

Irdkosketused

• Lidnan tobmuden aluzkundoiden oficialine sait (amo-harovsk.ru). (ven.)
• Lidnan informacine sait (харовчане.рф). (ven.)