Harovsk

Harovsk
Харовск

Valdkund	Venäma
Eläjiden lugu (2023)	8,361 ristitud
Pind	10 km²
Telefonkod	+7−81 732-xx-xxx
Avtokod	35
Aigvö	UTC+3 (MSK+0)

Harovsk (ven.: Ха́ровск) om Venäman lidn Vologdan agjan keskuzpalas. Se om Harovskan ümbrikon administrativine keskuz i üks'jäine lidn.

Istorii

Eländpunktan aluz om pandud vl 1903 kuti Harovskii-žilo sauvomha stöklantegint (pästli himižid butulid i mülüid akkumulätoroiden täht vhesai 2007). Žilo Harovskai-raudtestancijanno (ven.: Харовская) zavodihe vspäi 1898 sauvomha stancijad i raudtesildad, sid' holitamha raudted. Vhesai 1904 nimitihe stancijad Kubino i vll 1904−1914 Leščovo. Vspäi 1933 ühtištadihe niid Harovsk-radnikžilho. Harovsk sai lidnan statusad vn 1954 28. päiväl redukud.

1930-nziš vozišpäi saudihe äi edheotandoid: mecanümbriradai tegim, söndtavaroiden kombinat, špaloiden imetusen tegim, ezitegesiden edheotand tehmaha muziksoitoid, leibänkombinat, maidtegim, pölvhantegim, Vologdan optiž-mehanižen tegimen filial.

Harovskan ižandusen päsarakod oma mecan ümbriradmine i sömtegimišt, mugažo tehnologižen mašiništon tegim agrariž-tegimištoližen kompleksan täht radab.

Geografijan andmused

Lidnan sijaduz rajonas vn 2012 kartal

Lidn sijadase Kuben-jogen hural randal tobjimalaz (ven.: Кубена, Kubenan järven bassein), kukhikahas tahondas, 120..180 m ü.m.t. korktusil.

Matkad Vologdhasai om 84 km suvhe orhal vai 110 km avtotedme. Lähembaižed lidnad oma Sokol 55 km suvhe orhal vai 73 km avtotedme i Kadnikov 51 km suvhe orhal vai 90 km avtotedme.

Tobmuz

Harovsk oli lidnankundan üks'jäižeks eländpunktaks. Lidnankundan pind oli 17,7 nellikkilometrad. Se om tühjitadud vn 2022 kezakuspäi, ümbrikon territorialine palakund om sätud sen sijas.

Lidnankundan tobmuden pämez' oli sen Nevondkundan ezimez'. Lidnan jäl'gmäine pämez' oli Ol'ga Mirolübova (reduku 2018 — sulaku 2023). Edeline lidnan pämez' oli Vladimir Majorov (kül'mku 2016 — reduku 2018). Ned-žo ristitud tegiba lidnan Administracijan pämehen velgusidme ičeze radsijal. Nevondkund om pästtud radmaspäi vn 2023 sulakus. Administracijan likvidacii jätktase tähäsai (uhoku 2024).

Eläjad

Vn 2010 Venäman rahvahanlugemižen mödhe lidnan eläjiden lugu oli 10 079 ristitud, vn 2021 — 8 389 ristitud, rajonan ristitišton koume videndest. Vl 2017 lidnan ristitišt oli 9 185 eläjad. Kaikiš suremb lidnan ristitišt oli 13 200 ristitud vl 1992.

Rahvahad (enamba 0,4 % vl 2021): venälaižed — 95,5 %, toižed rahvahad — 2,6 %, rahvahuden ozutandata — 1,9 %.

Ortodoksižen hristanuskondan koume pühäpertid oma avaitud lidnas: ph. Serafim Sarovalaižen jumalanpert' (letihe vll 2001−2004), ph. Katromalaižen Onufrijan jumalanpert' (saudihe vl 1990), kaikiden pühämehiden časoun' (om sätud vll 1998−2001).

Sokolan mectegimištoližen politehnižen tehnikuman filial om lidnan professionaližen opendusen aluzkundaks.

Transport

Avtobusad oma kundaližeks transportaks lidnas da sen ümbrištos.

Ezilidnelektrojonused ajeltas Vologdhasai i Vožeg-žilhosai.

Galerei

• 
  Kč4-klassan puruvedim-muštnik (2005)
• 
  Špaloiden imetusen tegim vl 2005
• 
  Harovskai-raudtestancijan sauvuz vl 2013

Irdkosketused

• Lidnan tobmuden sait edel vn 2018 elokud (amo-harovsk.ru). (ven.)
• Harovskan istoriž-čomamahtoižen muzejan sait (museum-kharovsk.vlg.muzkult.ru). (ven.)