Krasavino

Krasavino
Красавино

Lidnanznam
Valdkund	Venäma
Eläjiden lugu (2021)	5,827 ristitud
Pämez'	Jurii Buškovskii (2015—)
Telefonkod	+7−81 738-xx-xxx
Avtokod	35
Aigvö	UTC+3 (MSK+0)

Krasavino (ven.: Краса́вино) om Venäman lidn Vologdan agjan pohjoižpäivnouzmas. Se om Suren Ustügan rajonan kahtenz' lidn, Krasavinon lidnankundan keskuz.

Istorii

Nügüdläižen eländpunkt mainitase Krasavino-küläks 19. voz'sadan augotišespäi, se oli külišton keskuses. Külä šingotihe, i vozil 1842−1851 saudihe tekstil'fabrikad pästmaha hoikid pölvazkanghid.

Krasavino sai lidnan statusad vl 1947. Vozil 1960−1980 udištihe pertištod, saudihe lebukodid, laukoid, äižiruižid pertid. Krasavinon uz' LES 63,8 MVt vägevudenke radaškanzi vl 2010, se tegeb elektrust londuseližes gazaspäi, vajehti vn 1957 lidnan LES:ad (oli 6 MVt). Vl 2012 pölvhankombinat tuli bankrotnendale, lidnan tegimišt diversificiruiše.

Krasavinon ižandusen päsarakod oma elektroenergetine, sauvondmaterialiden tehmine (savič, pumaterialad) i sömtegimišt (mecproduktoiden ümbriradmine).

Geografijan andmused

Lidn sijadase rajonan pohjoižes, Pohjoižen Dvinan hural randpolel i sen Lapink-ližajogen (ven.: Ла́пинка 22 km pitte) randoil, 65 m ü.m.t. keskmäižel korktusel. Matkad Vologdhasai om 410 km suvipäivlaskmha orhal vai 465 km avtotedme. Lähembaižed lidnad oma Sur' Ustüg 25 km suvhe orhal vai avtotedme i Kotlas 34 km pohjoižhe orhal vai 44 km avtotedme. Krasavino-raudtestancii sijadase koumes kilometras päivlaskmha lidnaspäi.

Kaik kuz' küläd mülüdas lidnankundha Krasavinon ližaks. Lidnankundan pind — 60 km². Küläd oma: Buhinino, Korobovskoje, Korolövo, Podgor'je, Uz' Külä (ven.: Новая Деревня), Uz' Žilo (Новое Село).

Eläjad

Vn 2010 Venäman rahvahanlugemižen mödhe lidnan eläjiden lugu oli 7 003 ristitud, lidnankundan — 7 479 ristitud, rajonan ristitišton seičemendez. Kaikiš suremb lidnan ristitišt oli 11 186 eläjad vl 1959. Vl 2017 kaik 6 084 ristitud elihe lidnas i 6 539 ristitud kaikes lidnankundas.

Ortodoksižen hristanuskondan tazostadud apostolihe Vladimiran jumalanpert' om saudud vll 2001−2004, se vajehti pandud mantazole ühtennimišt jumalanpertid (oli olmas vll 1889−1933).

Lähembaižed professionaližen opendusen aluzkundad sijadasoiš Sures Ustügas.

Transport

Avtobusad oma kundaližeks transportaks lidnas, ühtenzoittas sidä lähižidenke eländpunktoidenke. «Sur' Ustüg — Kotlas»-avtote ümbärdab lidnad päivlaskmaspäi.

Krasavino-raudtestancii zavodi radod udel sarakol Surhe Ustüghasai vl 1977, se om vaiše turistjoukuiden da jüguiden täht, mecan i mectegesiden täht tobjimalaz.

Irdkosketused

• Lidnankundan tobmuden aluzkundoiden oficialine sait (adm-krasavino.ru). (ven.)