Kadnikov

Kadnikov
Кадников
	Lidnanznam;
Valdkund	Venäma
Eläjiden lugu (2021)	4,440 ristitud
Pind	5 km²
Pämez'	Mihail Korznikov; (tal'vku 2022—,; Михаил Корзников,; mugažo kül'mku 2009 — uhoku 2018)
Telefonkod	+7−81 733-xx-xxx
Avtokod	35
Aigvö	UTC+3 (MSK+0)

Kadnikov (ven.: Ка́дников) om Venäman lidn Vologdan agjan keskuzpalas. Se om Sokolan rajonan kahtenz' eländpunkt eläjiden lugun mödhe, lidnankundan keskuz.

Istorii[redaktiruida | redaktiruida purde]

Eländpunktan aluz om pandud Kadnikovan pustolänha kaičendpostaks vl 1492, nimitihe Kadnik-nimen mödhe («urdamnik»). Kadnikovskai-külä zavodihe neciš postaspäi. Vspäi 1780 oli järedan makundan lidnan statusanke. Oli torguindan keskuseks, serverz'-se torgovanoiden erižpertid om kaičenus lidnas. Raudten sauvond jäi lidnad šingotesen veres 20. voz'sadal. Vspäi 1929 om Sokolan rajonan palaks (nimitihe Sverdlovan rajonaks vhesai 1932).

Kadnikov šingotase sömtegimištol (tähkheiniden söndtavaroiden kombinat, leibän edheotand), mecan ümbriradmižel i turbhan samižel. Edel 2011. vot kartohkčipsoiden ceh radoi söndtavaroiden kombinatal, paloi lophu.

Geografijan andmused[redaktiruida | redaktiruida purde]

Lidn sijadase Suhonanveren alangištos, Sodimanjogen randal (ven.: Содима 13 km pitte, Pel'šman hura ližajogi, Suhonan hurapol'ne bassein), 140 m ü.m.t. keskmäižel korktusel. Matkad Vologdhasai om 40 km suvipäivlaskmha «Holmogorid»-avtotedme (M8). Lähembaine lidn om Sokol-rajonkeskuz 15 km suvipäivlaskmha sil-žo tel. Trass ümbärdab Kadnikovad suvipäivnouzmaspäi.

Nell'kümne küläd mülüdas lidnankundha Kadnikovan ližaks.

Eläjad[redaktiruida | redaktiruida purde]

Vn 2010 Venäman rahvahanlugemižen mödhe lidnan eläjiden lugu oli 4 614 ristitud, rajonan ristitišton kümnendez, lidnankundan (Zamošjen küläkundanke) — 5 730 ristitud. Kaikiš suremb ristitišt oli enamba vit tuhad eläjid vozil 1979−2008 (5 500 rist. vll 1996−1998). Vl 2017 kaik 4 588 ristitud elihe lidnas i 5 404 ristitud kaikes lidnankundas.

Ortodoksižen hristanuskondan viž pühäpertid^[1] oma saudud lidnas: ph. Illä-endustajan jumalanpert' (1776), ph. Dmitrii Solunalaižen pühäpert' (ei ole väges) om olmas lidnan kaumištos vspäi 1826, mugažo muretud Pel'šman mez'jumalankodin časoun' (om letud vll 1879−1882) sijadase lidnas, i kahten jumalanpertin sauvused oma kaičenus no ei ole rados. Ph. Mikulai-čudonsädajan päjumalanpert' ei ole kaičenus.

Professionaližen opendusen aluzkundad ratas lähembaižiš lidnoiš.

Lidnankundan Nevondkund om likvidiruidud vn 2016 tal'vkus, rajonan suim ezimehenke tegeb sen velgusidme. Lidnan Administracijan pämez' om Mihail Korznikov vn 2022 tal'vkuspäi, radoi sil-žo sijal ende (kül'mku 2009 — uhoku 2018). Edeline Administracijan pämez' om Aleksandr Komel'kov (uhoku 2018 — tal'vku 2022).

Galerei[redaktiruida | redaktiruida purde]

Sluginovan pert' (2016)
Illä-endustajan jumalanpert', vn 2008 nägu
Torguindrived — jarmanksauvuz vl 2016
Ph. Grigorii Pel'šmalaižen časoun', vn 2016 nägu
Rešetov-torgovanan lauk i varažomad (2016)

Homaičendad[redaktiruida | redaktiruida purde]

↑ Kadnikovan pühäpertid sobory.ru-saital. (ven.)

Irdkosketused[redaktiruida | redaktiruida purde]

Kadnikov Vikiaitas

	Vologdan agjan lidnad
	Babajevo \| Belozersk \| Čerepovec \| Gräzovec \| Harovsk \| Kadnikov \| Kirillov \| Krasavino \| Nikol'sk \| Sokol \| Sur' Ustüg \| Tot'm \| Ustüžn \| Vitegr \| Vologd

[1] Kadnikovan pühäpertid sobory.ru-saital. (ven.)

[1]