Kirillov (lidn)

Kirillov
Кириллов
Lidnanznam;	Flag;
Valdkund	Venäma
Eläjiden lugu (2023)	7,069 ristitud
Telefonkod	+7−81 757-xx-xxx
Avtokod	35
Aigvö	UTC+3 (MSK+0)

Kirillov (ven.: Кири́ллов) om Venäman lidn Vologdan agjan päivlaskmaižes palas. Se om Kirillovan ümbrikon (edel vn 2023 kezakud — rajonan) administrativižeks keskuseks da palaks.

Istorii

Eländpunktan aluz om pandud vl 1397 kuti Pühän Kirill Vaugedjärvelaižen mez'jumalankodi (kätihe muzejaks vspäi 1924). Torguindslabad jumalankodinno sai makundan lidnan statusad Kirillov-nimitusenke Uz'lidnan gubernijas vl 1776. Lidn sai pertišton ezmäšt planad vl 1777. Kätihe Leningradan agjan rajonan keskuseks vl 1927. Vspäi 1937 lidn om Vologdan agjan palaks.

Kirillovan ižandusen sarakod oma turizman holituz, sömtegimišt (argvointegim, leibäntegim, kulutaikooperacijan söndtavaroiden kombinat, pened edheotandad), mecan pened ümbriradajad edheotandad, mašinansauvomine (Kirillovan mehanine tegim pästab tegesid metallaspäi i räzinaspäi, Kirillovan katiltegim tegeb katlid).

Geografijan andmused

Lidn sijadase ümbrikon suves, Süväjärven randal, 120 m ü.m.t. keskmäižel korktusel.

Matkad Vologdhasai om 105 km suvipäivnouzmha orhal vai 125 km A119-avtotedme tobjimalaz. Lähembaine lidn om Belozersk 37 km lodeheze orhal vai 44 km avtotedme maksliženke ehtatimenke. Lähembaine passažirine raudtestancii radab Čerepovecas sada kilometrad suvhe.

Tobmuz

Lidnankund om kätud ümbrikon territorialižieks palakundaks vn 2023 kezakuspäi. Kirillovan ližaks, 23 küläd da kaks' sijašt mülüiba enččehe lidnankundha, kudambišpäi 16 oma kezakülikš da oliba kaikenaigaižeta ristitištota vl 2010. Lidnankundan pind oli 27,02 km², ristitišt — 8 034 eläjad (2021), se oli rajonan ristitišton viž ühesandest. Vajehtihe lidnankundan röunoid vspäi 2015, konz mülütihe Gorici-žilod sihe.

Lidnankundan jäl'gmäine pämez' oli Sergei Usov vn 2021 tal'vkuspäi. Edeližed lidnan pämehed (Kirillov-lidnan Nevondkundan ezimehed) oma Tat'jana Dorožkina (kül'mku 2018 — tal'vku 2020) i Andrei Kotov (2012−2018). Lidnan Administracijan pämez' oli Jevgenii Repin vn 2019 heinkuspäi. Edeline Administracijan pämez' om Aleksandr Polkovnikov (tal'vku 2015 — heinku 2019).

Eläjad

Vn 2010 Venäman rahvahanlugemižen mödhe lidnan eläjiden lugu oli 7 728 ristitud, vn 2021 — 7 149 ristitud. Vl 2017 kaik 7 482 ristitud elihe lidnas i 8 034 ristitud kaikes lidnankundas. Kaikiš suremb lidnan ristitišt oli ühesa tuhad eläjid vl 1992.

Rahvahad (lidnan eläjad, enamba 0,4 % vl 2021): venälaižed — 87,1 %, toižed rahvahad — 3,0 %, rahvahuden ozutandata — 9,9 %.

Ortodoksižen hristanuskondan kaks'kümne pühäpertid^[1] oma saudud lidnas: Kazanin Jumalanmaman jumalaižen päjumalanpert' (nügüdläine versii om letud vodele 1825), kaks' jumalanpertid, kaks' časounäd, Pühän Kirill Vaugedjärvelaižen mez'jumalankodi (mülüdas sihe: Pühän Jumalanmaman Emäganpäivän päjumalanpert' (1497), 11 jumalanpertid i koume časounäd).

Lapsiden opendusen aluzkundad oma kaks' nimitadud i nomeruidud päivkodid (nomer 3 i 4), Kirillovan keskškol nevondkundaližen A.G. Obuhov-vägimehen nimed, lapsiden sädamižen pert', čomamahtoiden škol, lapsiden da norišton sportškol. Vologdan agjan kul'turan i turizman kolledž^[2] om lidnan professionaližen opendusen aluzkundaks.

Galerei

Kirillovan rajonan administracijan sauvuz (2006)
Sündun Toižetamižen jumalanpert' (om saudud vl 1595) i veziverai, vn 2017 nägu
«Rus'»-adivpert' vl 2006
Kirillovan leibäntegim (2011)
Hengeline škol (seminarii) vl 2016

Homaičendad

Irdkosketused

Kirillov (lidn) Vikiaitas

	Vologdan agjan lidnad
	Babajevo \| Belozersk \| Čerepovec \| Gräzovec \| Harovsk \| Kadnikov \| Kirillov \| Krasavino \| Nikol'sk \| Sokol \| Sur' Ustüg \| Tot'm \| Ustüžn \| Vitegr \| Vologd

[1] Kirillovan pühäpertid sobory.ru-saital. (ven.)

[2] Vologdan agjan kul'turan i turizman kolledž (votkkir.ru). (ven.)

[1]

[2]