Babajevo

Babajevo
Бабаево
	Lidnanznam;
Valdkund	Venäma
Eläjiden lugu (2021)	11,416 ristitud
Pind	14,57 km²
Pämez'	Jurii Parfenov; (2009—)
Telefonkod	+7−81 743-xx-xxx
Avtokod	35
Aigvö	UTC+3 (MSK+0)

Babajevo (ven.: Баба́ево) om Venäman lidn Vologdan agjan suvipäivlaskmas. Se om Babajevon ümbrikon administrativižeks keskuseks.

Istorii

Babajevo-külä mainitase vl 1545 da mülüi Babajevon lidnankundha edel küläd ühtištust lidnanke vn 2021 tal'vkus. Nikol'skii Zavod-külä oli olmas vspäi 1822, metallurgine tegim oli siš, pästtihe telegrafveimid, nagloid da koukuid.

Nügüd'aigaižen eländpunktan aluz om pandud vl 1902 kuti Babajevo-raudtestancii, nimitihe lähižen külän mödhe. Vl 1925 ühtištadihe žilod raudtestancijanno lähiženke Nikol'skii Zavod-külänke da anttihe lidnan statusad.

Babajevon ižandusen päsarakod oma mecan ümbriradmine (kleidüd brusan tegim^[1], mecpilindedheotandad), elektrotehnižiden tegesiden pästand (SAS «Svetlana-Rentgen»). Ühtennimine Babajevo-raudtestancii radab «Vologd — Volhov»-keskustal. Londuseližen gazan kompressorstancii sijadase lidnan ümbrištos «Gräzovec — Viipur»-gazanveimel.

Geografijan andmused

Lidn sijadase ümbrikon suves, Mologan da Šeksnan alangištos, Kolp'-jogen randoil. Se seižub ülüdel keskel mecakahid soid, 137 m ü.m.t. keskmäižel korktusel. Matkad Vologdhasai om 246 km raudtedme, 309 km avtotedme. Lähembaine lidn om Ustüžn 68 km suvhe orhal vai 94 km avtotedme. Lähembaine sur' lidn om Čerepovec 116 km päivnouzmha orhal, 119 km raudtedme vai 177 km avtotedme.

Klimat om ven kontinentaline. Voden keskmäine lämuz om +3,6 C°, kezakun-elokun +15..+18 C°, tal'vkun-uhokun −8..−9 C°. Ekstremumad oma −47 C° i +35 C°. Paneb sadegid 634 mm vodes, enamba kezal (72..83 mm kus), vähemba uhokus-sulakus (30..34 mm kus).

Tobmuz

Kaik nell' eländpunktad mülüihe enččehe lidnankundha Babajevon ližaks (2010): Zagotskot-žilo (kaikenaigaižeta ristitištota), küläd Babajevo (64 rist.), Kolpino (22 rist.), Visokovo (kaikenaigaižeta ristitištota). Kaik ned oma ühtištadud lidnanke vn 2021 tal'vkus, lidnankundan tobmuden organad oma likvidiruidud vn 2022 kezakuspäi. Lidnankundan pind oli 185,3 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 12 073 ristitud. Vl 2017 kaik 11 493 ristitud elihe lidnas i 11 608 ristitud kaikes lidnankundas. Kaikiš suremb lidnan ristitišt oli läz 14 tuhad eläjid vozil 1989−2001 (14 400 rist. vl 1996).

Ortodoksižen hristanuskondan kaks' jumalanpertid^[2] oma avaitud lidnas: ph. Gurii Šaločilaižen (om letud vll 2006−2019) i phh. Pedran da Paulan (oli rados vll 1994−2019, nügüd' pühäpäivän škol).

Lähembaižed professionaližen opendusen aluzkundad ratas Ustüžnas i Čerepovecas.

Galerei

Vezičuhundused raudtestancijanno (2011)
Muštnik pölištunuzile Suren sodan aigan sijaližile sodamehile (2011)
Puruvedim-muštnik (2011)

Homaičendad

↑ Punümbriradajan «Babajevskii»-kombinatan sait (babaevodok.ru). (ven.) (angl.)
↑ Babajevon pühäpertid sobory.ru-saital. (ven.)

Irdkosketused

Babajevon kodirandantedištandmuzejan sait (km-babaevo.vlg.muzkult.ru). (ven.)

Babajevo Vikiaitas

	Vologdan agjan lidnad
	Babajevo \| Belozersk \| Čerepovec \| Gräzovec \| Harovsk \| Kadnikov \| Kirillov \| Krasavino \| Nikol'sk \| Sokol \| Sur' Ustüg \| Tot'm \| Ustüžn \| Vitegr \| Vologd

[1] Punümbriradajan «Babajevskii»-kombinatan sait (babaevodok.ru). (ven.) (angl.)

[2] Babajevon pühäpertid sobory.ru-saital. (ven.)

[1]

[2]