Sokol (lidn)

Sokol
Сокол
Lidnanznam;	Flag;
Valdkund	Venäma
Eläjiden lugu (2021)	36,067 ristitud
Pind	69,42 km²
Pämez'	Jurii Vasin; (reduku 2017—)
Telefonkod	+7−81 733-xx-xxx
Avtokod	35
Aigvö	UTC+3 (MSK+0)

Sokol (ven.: Со́кол «sakkal») om Venäman lidn da lidnankund Vologdan agjan keskuzpalas. Se om agjan koumanz' lidn eläjiden lugun mödhe, Sokolan rajonan administrativine keskuz.

Istorii[vajehtada | vajehtada lähte]

Sokolovo-külä mainitase ezmäižen kerdan vl 1615. Vl 1897 sauvoškanzihe «Sokol»-bumagfabrikad läz küläd, nimitihe külän mödhe. Vn 1932 2. päiväl keväz'kud Sokol-radnikžilo sai lidnan statusad VCIK:an käskön mödhe.

Sokol om agjan cellülozbumagaižen tegimišton da pun süvän ümbriradmižen keskuz, pästtas nenid tavaroid: cellüloz, erazvuiččiden sortuiden bumag, karton, puižed pertid da niiden detalid, faner, CLT-panelid (üks'jäine tehmine Venämas), pukuid- i pucementapakod, mebel', pilindmaterialad, fanerine i kartonpakuitez, pujauh. Mugažo savičun tegim i sagenzoittud maidon kombinat ratas lidnas.

Geografijan andmused[vajehtada | vajehtada lähte]

Lidnan tobj pala sijadase Suhon-jogen molembil randoil. Randad ühtenzoittas raudte- da avtotesildal lidnan keskuses da M8-trassan avtotesildal vides kilometras suvipäivnouzmha lidnaspäi. Lähembaine lidn om Kadnikov 15 km pohjoižpäivnouzmha. Lähembaine järed lidn — Vologd, matkad sihesai om 35 km suvhe orhal, 42 km avtotedme vai raudtel.

Sokol om ümbärtud mecoil da soil. Voden keskmäine lämuz om +2,5 C°.

Sokol om lidnankundan üks'jäine eländpunkt. Lidnfartaliden pind om 30,43 km².

Tobmuz[vajehtada | vajehtada lähte]

Vhesai 2006 lidn oli alištunu agjan tobmudele oikti, sid' kändihe Sokolan rajonan palaks.

Käskusenandai tobmuz om Sokol-lidnan Nevondkund 20 ezitajanke (koumanz' kucund vspäi 2013). Lidnan pämez' om Nevondkundan ezitai, Jurii Vasin. Hän om valitud vn 2017 sügüz'kul.

Vn 2017 kezakuspäi Sergei Räbinin radab lidnan Administracijan pämehen.

Eläjad[vajehtada | vajehtada lähte]

Vl 1931 radnikžilon ristitišt oli 15 100 eläjad. Vl 1967 50 tuhad ristituid elihe lidnas, se kändihe kaikiš surembaks luguks. Vn 2010 Venäman rahvahanlugemižen mödhe lidnan eläjiden lugu oli 37 233 ristitud, rajonan koume nelländest. Vl 2017 lidnan ristitišt oli 37 191 eläjad.

Ortodoksižen hristanuskondan kaks' pühäpertid^[1] oma avaitud lidnas: Jumalan Voznesenjan pühäpert' (vspäi 1997) i ph. Ioann Kronštadtalaižen (vspäi 2015). Protestantizman koume kundad oma, niiden kesken baptizm, seičemenden päivän adventistoiden jumalankodikund.

Kodirandantedištandmuzei, «Soldek»-kul'turpert', «Suhonskii»-kul'turpert'kulu, čomamahtoiden lapsidenškol, lapsiden da norišton sportškol, kaks' fizkul'turiž-tervehtamižkompleksad i ujundbassein oma saudud lidnas. Jäpert'kulu om sauvomas vspäi 2021. Opendusen aluzkundad oma 16 päivkodid, seičeme školad keskopendusenke, mectegimištoline politehnine tehnikum^[2] i pedagogine kolledž^[3].

Transport[vajehtada | vajehtada lähte]

Avtobusad da taksid oma kundaližeks transportaks lidnas. Avtobusad da jonused ühtenzoittas Sokolad Vologdanke da agjan toižidenke lidnoidenke.

Jogiport sijadase lidnan lodehes, Kogaš-lidnanlaptas. Suhon-raudtestancii om Suhon-jogen oiktal randal. Lähembaine lendimport om Vologd (VGD / ВГД / ULWW) Vologdan pohjoižröunanno, 30 km suvhe Sokolaspäi. Se om civiline lendimport federaliženke znamoičendanke, tehtas reisid Moskvha, Piterihe, Surhe Ustügha da Čerepovecha.

Sebruzlidnad[vajehtada | vajehtada lähte]

Suomenma Valkeakoski, Suomenma (vspäi 1971)^[4]

Galerei[vajehtada | vajehtada lähte]

Lidnan administracijan edeline pert' (2008)
Suhonan sagenzoittud maidon kombinat vl 2020
Külänvuitte pertišt (2011)
Raudte- da avtotesild Suhonanjoges päliči vl 2008

Homaičendad[vajehtada | vajehtada lähte]

Irdkosketused[vajehtada | vajehtada lähte]

Sokol (lidn) Vikiaitas

	Vologdan agjan lidnad
	Babajevo \| Belozersk \| Čerepovec \| Gräzovec \| Harovsk \| Kadnikov \| Kirillov \| Krasavino \| Nikol'sk \| Sokol \| Sur' Ustüg \| Tot'm \| Ustüžn \| Vitegr \| Vologd

[1] Sokolan pühäpertid sobory.ru-saital. (ven.)

[2] Sokolan mectegimištoližen politehnižen tehnikuman sait (slpt.ru). (ven.)

[3] Sokolan pedagogižen kolledžan sait (p19602.edu35.ru). (ven.)

[4] Valkeakosken ystävyyskaupungit (Valkeakoskin sebruzlidnad). — Lidnan oficialine portal (valkeakoski.fi). (suom.)

[1]

[2]

[3]

[4]