Vitegr

Vitegr
Вытегра
Lidnanznam;	Flag;
Valdkund	Venäma
Eläjiden lugu (2021)	10,116 ristitud
Pind	16 km²
Pämez'	Aleksandr Zimin; (reduku 2017—)
Telefonkod	+7−81 746-xx-xxx
Avtokod	35
Aigvö	UTC+3 (MSK+0)

Vitegr (ven.: Вы́тегра) om Venäman lidn da lidnankund Vologdan agjan lodehes. Se om Vitegran rajonan administrativine keskuz.

Etimologii

Edel 1710. vot eländpunktan nimi oli Vitegran Pagast. Vitegr-nimitusen tarkoiged augotižlibund om tundmatoi, no se om suomalaiž-ugrilaine.

Vozil 1710−1773 Vängi-külä oli lidnan sijas, Vängi-jogen nimen mödhe. «Vängi»-nimituz om karjalan kelen vengi-sanaspäi, znamoičeb «oja, pen' jogi, hijam (jogensarak)».

Istorii

Eländpunkt mainitase ezmäižen kerdan vl 1496. Vl 1773 külä sai lidnan statusad i nimitihe nügüdläižikš. Saudihe pertištod vn 1776 oigedsaumaižen planiruindan mödhe.

Vozil 1715−1847 laivansauvomižen dok radoi Vitegr-jogen ülüižele lidnalpäi^[1]. Vll 1784−1922 Vitegr makundanke oli Oloncan agjan palaks. Läz 20 torgovanoiden erižpertid i küme muštpachid oma mel'heižtahoikš.

Vitegr šingotase mecan ümbriradmižel, Volgan-Baltijanmeren veziten holitusel i turizmal.

Geografijan andmused

Vitegr sijadase ühtennimižen i Vängi-jogiden ühthejoksmusenno, Vitegr-jogen oiktal randal, 50 m ü.m.t. keskmäižel korktusel. Vitegran vezivaradim levineb jogen ülüižele. Valdmad seištas 15 kilometras Änižen randištolpäi. Matkad Vologdhasai om 337 km suvipäivnouzmpolehe avtotedme. Lähembaižed lidnad oma Pudož (Karjal) 89 km pohjoižhe orhal vai 102 km avtotedme, Kargopol' (Arhangel'skan agj) 144 km pohjoižpäivnouzmha orhal vai 220 km avtol, Belozersk 131 km suvipäivnoumha orhal vai 195 km avtotedme.

Vitegr om lidnankundan üks'jäine eländpunkt. Lidnan ohjastuz alištub rajonadministracijale.

Eläjad

Vn 2010 Venäman rahvahanlugemižen mödhe lidnan eläjiden lugu oli 10 491 ristitud, rajonan kaks' videndest. Kaikiš suremb ristitišt oli 12 905 eläjad vl 1989. Vl 2017 lidnan ristitišt oli 10 232 eläjad.

Ortodoksižen hristanuskondan nell' pühäpertid^[2] oma saudud lidnas: Pühäpäivän päjumalanpert' (1796−1800, sauvuz kävutase toižin), Sretenjan jumalanpert' (letihe vll 1869−1873) i kaks' časounäd.

Vitegran politehnine tehnikum^[3] om lidnan professionaližen opendusen aluzkundaks.

Lidnan pämez' om Nevondkundan ezimez'. Lidnan Administracijan pämez' om Andrei Hromov vn 2022 redukuspäi. Edeline Administracijan pämez' om Aleksandr Jermolin (kül'mku 2017 — reduku 2022).

Galerei

Lidnan ohjastusen pert' (2017), enzne Kuznecovan pert'
Sretenjan päjumalanpertin nägu vl 2017
Vitegran jogivaldmad vl 2017
Lapsiden čomamahtoiden škol (2014)
Sportkeskuz vl 2018

Homaičendad

↑ Вытегра // Энциклопедия Города России («Venäman lidnad»-encikolpedii). — M.: Bol'šaja Rossijskaja Enciklopedija, 2003. — Lp. 97. ISBN 5-7107-7399-9. (ven.)
↑ Vitegran pühäpertid sobory.ru-saital. (ven.)
↑ Vitegran politehnižen tehnikuman sait (p09601.edu35.ru). (ven.)

Irdkosketused

Lidnan tobmuden sait (myvitegra.ru). (ven.)

Vitegr Vikiaitas

	Vologdan agjan lidnad
	Babajevo \| Belozersk \| Čerepovec \| Gräzovec \| Harovsk \| Kadnikov \| Kirillov \| Krasavino \| Nikol'sk \| Sokol \| Sur' Ustüg \| Tot'm \| Ustüžn \| Vitegr \| Vologd

[1] Вытегра // Энциклопедия Города России («Venäman lidnad»-encikolpedii). — M.: Bol'šaja Rossijskaja Enciklopedija, 2003. — Lp. 97. ISBN 5-7107-7399-9. (ven.)

[2] Vitegran pühäpertid sobory.ru-saital. (ven.)

[3] Vitegran politehnižen tehnikuman sait (p09601.edu35.ru). (ven.)

[1]

[2]

[3]