Astrahanin agj

Astrahanin agj
Астраханская область

Astrahanin agjan flag Astrahanin agjan znam
Pälidn	Astrahan'
Pind - Ühtes - saum vezid (%).	54-nz' 49 024 km² 13,96
Eläjiden lugu - Kaik - Sageduz	51-nz' 1,017,514 ristitud (2018) 20,76 rist./km²
Regionaline KSP - Kaik, nügüdläižiš arvoiš - Ühtele hengele	55-nz' 338,7 mlrd rub. (2016) 332,4 tuh. rub.
Federaline ümbrik	Suvine
Venäman ekonomine region	Volganrandaline
Valdkundkel' (-keled)	venäkel'
Gubernator	Aleksandr Žilkin
Ohjastusen ezimez'	Rasul Sultanov
Agjan Duman ezimez'	Igor' Martinov
Avtokod	30
Aigvöd	UTC+4 (MSK+1)

Astrahanin agj (ven.: Астраханская область, kaz.: Астрахан облысы) om Venälaižen Federacijan subjekt.

Se mülüb Federaližhe suviümbrikho.

Agjan pälidn da kaikiš suremb lidn om Astrahan' (agjan ristitišton läz pol't).

Keled

Valdkundkel' om üks'jäine — venäkel'.

Istorii

Astrahanin agj om olmas vs 1943 tal'vkun 27. päiväspäi.

Astrahanin agjan Päkäskuz om vahvištadud vn 2007 9. päiväl sulakud Agjan Duman ezitajil da om väges nügüd' äiluguižidenke vajehtusidenke. Se vajehti endišt Päkäskust, kudamb oli vahvištadud vn 1997 28. päiväl keväz'kud.

Geografijan andmused

Astrahanin agjan reljefan kart.

Astrahanin agj levigandeb Volgan da Ahtuban alangištos. Agj röunatab Kazahstananke päivnouzmas (sen Päivlaskmaiž-Kazahstanan agjanke), Kalmikijan Tazovaldkundanke päivlaskmas da Volgogradan agjanke pohjoižes. Agjan suvižed randad lainištab Kaspijan meri.

Reljef om kukhikaz lodehes da alangoikaz suves. Kaikiš korktemb čokkoim om Sur' Bogdo-kukkaz (161,9 m). Kaikiš alahaižemb om Kaspijan meren kendäk (−27 m).

Klimat om kontinentaline kuiv. Keza om räk. Tal'vel sulasä oleskeleb paksus. Paneb sadegid 200..300 mm vodes, sulakul-heinkul tobjimalaz.

Londuseližed varad oma londuseline gaz, kivivoi, sauvondgips, keitandsol.

Tobmuz

Lidnaluskundoiden sauvuz om agjan gubernatoran da Ohjastusen ištundsija Astrahaniš.

Agjan pämez' nimitase gubernatoraks. Aleksandr Žilkin radab gubernatoran vs 2004 tal'vkun 23. päiväspäi. Kaik rahvaz änestab händast videks vodeks, enamba kaht strokud jäl'geten ei sa. Gubernator om mugažo agjan Ohjastusen pämez', hän märičeb sen strukturad da paneb Ohjastusen ezimest radnikusele sättutaden parlamentanke.

Astrahanin agjan parlament om Agjan Dum. Kaik rahvaz valičeb sen 58 ezitajad videks vodeks, vaiše 19 heišpäi sab rata kaikenaigašti. Igor' Martinov radab Duman ezimeheks vs 2016 sügüz'kun 26. päiväspäi.

Radonoigendai tobmuz om Astrahanin agjan Ohjastuz. Rasul Sultanov radab Ohjastusen ezimeheks vs 2017 sulakun 27. päiväspäi, hän-žo om varagubernatoraks. Agjan ministrused, agentused da radnikoičendad alištudas Ohjastusele.

Vn 2014 14. päiväl sügüz'kud valitihe gubernatorad, nügüdläine gubernator sai vägestust ezmäižel tural (75,28% änid) da radab koumanden strokun. Agjan Duman ühtnijoiden järgenduseližed valičendad oliba vn 2016 18. päiväl sügüz'kud.

Eläjad

Vn 2010 Venäman rahvahanlugemižen mödhe eläjiden lugu oli 1 010 073 ristitud. Kaikutte kahtenz' ristit koumespäi om lidnalaine.

Kaik om kuz' lidnad agjas, 7 lidnanvuittušt žilod i 428 külähišt eländpunktad.

Rahvahad (enamba 0,5% vl 2010): venälaižed — 61,2%, kazahlaižed — 14,8%, totarlaižed — 6,0%, ukrainalaižed — 0,8%, azerbaidžanlaižed — 0,8%, nogailaižed — 0,8%, čečenalaižed — 0,7%, kalmikalaižed — 0,7%, armenijalaižed — 0,6%, čiganalaižed — 0,5%, avarad — 0,5%, toižed rahvahad — 3,2%, rahvahuden ozutandata — 9,4%.

Irdkosketused

• Astrahanin agjan da sen Ohjastusen oficialine portal (astrobl.ru). (ven.)
• Astrahanin agjan gubernatoran oficialine sait (jilkin.ru). (ven.)
• Astrahanin agjan Duman oficialine sait (astroblduma.ru). (ven.) (angl.) (vaug.) (ukr.)