Piter

	Piter
	;
Eläjiden lugu	4 613 800
Pind	1 439 km²
Gubernator	Georgii Sergejevič Poltavčenko

Piter, Sankt-Peterburg (venäkelel: Санкт-Петербург) om federativižen alištusen lidn Venälaižes Federacijas, Lodehližen federativižen ümbrikan (okrugan) pälidn, Venäman da Leningradan agjan valdkundaližen tobmuden aluskundoiden sijaduztaho. Sur' Petr pani Piterin lidnan alusen vl. 1703. XVIII—XX vozsadoiš Piter oli Venälaižen Imperijan pälidnan.

Lidnan istorižed nimed:

Sankt-Piter-Burh/Sankt-Peterburg, 16 (27).5.1703 — 17 (30).8.1914
Petrograd, 18 (31).8.1914 — 25.1.1924
Leningrad, 26.1.1924 — 5.9.1991
Sankt-Peterburg, vodespäi 1991 sügüz'kun 6 päiväspäi.

Oficialižetomad nimed: «Pohjoine pälidn», «Pohjoine Pal'mir», «Pohjoine Venecii», «Lidn Neval», «Kul'turpälidn», «SPb», «Vauktoiden öiden lidn», «Revolücijan kätte (lidn)» (NSTÜ:n aigan) i m. e.

2010 vodel Piterin eläjiden lugu oli 4 613 800 eläjäd. Piter om kaikiš pohjoižemb lidn Mas, kudamban eläjiden lugu om enamb 1 mln eläjid. Se om koumanz' lidn Evropas ristituiden lugun mödhe (Moskvan da Londonan jäl'ghe) da ezmäine lidn, kudamb ei ole valdkundan pälidnan. Se om suren lidnaižen aglomeracijan keskuz. Piter sijadase Pohjoižes Evropas, Venälaižen Federacijan lodehpoles, Baltijanmeren Suomen lahten randal, Nevanjogen del'tas.

Piter om Venäman znamasine ekonomine, tedoline da kul'turkeskuz, sur' transportsol'm. Allegron-üläpiguzjonused kävudas Piterin da Hel'sinkin keskes, Sapsan-üläpiguzjonused kävudas Piterin, Moskv da Alauz’lidnan (Alanovgorodan) keskes. Piteriš om kundališt transportad: avtobusid, trolleibusid, tramvajid da maršrutkid. 1955 vodespäi lidnas radab metropoliten.

Piterin Istorine keskuz da ühtenzoittud senke muštpachiden kompleksad oma pandud UNESCO:n Man jäl’gusen nimikirjuteshe; se om kaikiš suremb turistine keskuz Venämas.

2008 vodespäi Piteriš sijadase Venälaižen Federacijan konstitucižen keskuzkundan sijaduz, 1992 vodespäi — RVÜ:n Parlamentoidenkeskeižen assamblejan sijaduz (Tavrine pert'kulu).