Avto

Benz Velo — üks' ezmäižiš avtoišpäi

Avto vai Avtomobil' (amuižgrek.: αὐτο — iče i latin.: mobilis — likkui) om motorine rel'satoi teine transportlikkuim minimum nellänke kezranke.

Avtotransport tegeb sirdmižiden tobmad palad šingotadud maiš. Vedab ajelten ristituid i jüguid. Erasti voib ajada tahodme teita.

Nügüd'aigaine avto kogoneb 15..20 tuhad detališpäi, niiden 150..300 oma kaikiš znamasižembad i tarbhaitas rajadusid kävutamižes. Kaik avtod mülüdas nenid surid paloid: šassi, konor' (pull' da kabin jüguavtos), likutim.

Klassifikacii

Avton toižendad oma kebnavto, jüguavto, specialižed avtod, avtobus, trolleibus, somuzavto. Sil-žo aigal traktor i motocikl oma toižed likkuimed.

Erištadas avtoid likutimen poltusen mödhe: vezipuru, benzin, dizel', ahtištadud londuseline gaz, nozoltadud gaz (propan-butanan segoituz), gazangeneratorine likutim, akkumuliruidud vezinik, akkumulätorbatarejiden elektruz, gibridine avto.

Tehmine

Avtosauvomine om tegii avtoid ižandusen sarak, mašinansauvomižen pala. Se tarbhaičeb äi detalid, niiden tehmine andab radod ristituiden znamasižele lugule kaikedme valdkundadme. Ühthekeratas avtoid unificiruidud detališpäi avtokompanijan tegimel. Amerikaižed «Oldsmobile»- i «Ford»-kompanijad kävutaškanziba konvejerad ühthekeradamižes i zavodiba massižen avtomobilizacijan mail'mas.

Kaikiš järedambad avtoiden tegijad (kuz'..ühesa millionad avtoid vodes, 2012): General Motors, Volkswagen Group, Toyota, Hyundai Motor, Ford, Renault-Nissan.

AÜV oli mail'man lideran pästtud avtoiden lugun mödhe hätken aigan. 1980-nzil vozil Japonii tegihe mugomaks lideraks. Vspäi 2009 Kitai om avtoiden pästandan ezinenas lugumäran mödhe i niiden kaikiš suremb südäitorguz.