Bilibino

Bilibino
Билибино (ven.)
Билибин (čukč.)
	Lidnanznam;
Valdkund	Venäma
Eläjiden lugu (2023)	5,409 ristitud
Pind	22,15 km²
Pämez'	Ol'ga Koževnikova; (semendku 2015—)
Telefonkod	+7−42 738-xx-xxx
Avtokod	87
Aigvö	UTC+12 (MSK+9)

Bilibino (ven.: Били́бино, čukč.: Билибин) om Venäman lidn da lidnankund Čukotkan avtonomižen ümbrikon lodehes. Se om ümbrikon kahtenz' lidn eläjiden lugun mödhe, Bilibinon rajonan administrativine keskuz (vn 1961 elokuspäi).

Istorii

Eländpunktan aluz om pandud vl 1955 kuti radnikžilo samha kuldad mägikombinatal. Vhesai 1956 nimitihe Karal'vaam:aks (ven. i čukč.: Каральваам, караль «pedroiden aidoitez» + ваам/веем «jogi») jogen mödhe. Udesnimitihe Jurii Bilibin-geologan kanzannimen mödhe, löuzi kuldregionad Koliman basseinas. Vl 1993 žilo sai lidnan statusad.

Bilibino šingotase kuldan samižel, sadas kaivuzmahtusel da ümbriratas sirdandküllästamižfabrikal penid löudmižsijid lidnas ümbri, mugažo lihamaidkombinat i maplodunfabrik (kazmuzhonuzedheotand i konservad) ratas. Bilibinon AES (48 MVt) lämbitab lidnad da varatoitab sidä elektroenergijal, sen vajehtuz dizel'stancijal planiruiše vspäi 2019.

Geografijan andmused

Lidn sijadase Karal'vaam-jogen lanktendan sijas Sur' Keperveem-jogehe (Koliman hurapol'ne bassein), 270 m ü.m.t. keskmäižel korktusel. Matkad Anadirihesai om 625 km suvipäivnouzmha. Lähembaine lidn om Pevek 240 km pohjoižpäivnouzmha orhal vai 360 km grunt- i tal'vteidme.

Klimat om arktine. Tal'v om vilu lujas da kuiv, sen aigan sulasä oleleb harvoin lujas. Voib panda halad kezan miččel taht kul. Voden keskmäine lämuz om −13,9 C°, kezakun-elokun +7..+10 C°, tal'vkun-uhokun −32..−33 C°. Ekstremumad oma −58 C° i +35,1 C°. Paneb sadegid 198 mm vodes, enamba kezakus-elokus (21..37 mm kus), vähemba uhokus-semendkus (6..9 mm kus).

Keperveem-žilo mülüb lidnankundha Bilibinon ližaks, lendimport sijadase siš.

Eläjad

Vn 2010 Venäman rahvahanlugemižen mödhe lidnan eläjiden lugu oli 5 506 ristitud, lidnankundan 5 829 ristitud, rajonan koume nelländest. Kaikiš suremb lidnan ristitišt oli 15 558 vl 1989. Vl 2017 kaik 5 348 ristitud elihe lidnas i 5 560 ristitud kaikes lidnankundas.

Ortodoksižen hristanuskondan ph. Serafim Sarovalaižen jumalanpert'^[1] om saudud lidnas vodele 2009.

Čukotkan lodehline tehnikum^[2] om lidnan professionaližen opendusen aluzkundaks. Ende Piterin tegimištoliž-ekonomižen kolledžan filial radoi mugažo.

Galerei

Telekommunikacine «Orbita»-kaimdaistancii (2015)
Ph. Serafim Sarovalaižen jumalanpert', vn 2013 nägu
Bilibinon AES vn 2016 sulakus
Arktik-mikrorajonas (2014)
Lidnan nägu vl 2015, administracijan sauvuz om nell'žiruine vauged siniženke alažirunke da katusenke oiktalpäi
Lidnan ujundbassein vl 2013