Darhan

Darhan
Дархан
Lidnanznam;	Flag;
Valdkund	Mongolii
Eläjiden lugu (2022)	87,696 ristitud
Pind	103 km²
Telefonkod	+976-(0)137
Aigvö	UTC+8

Darhan (mong.: Дархан [tárχəɴ] «sep'») om Mongolijan koumanz' lidn eläjiden lugun mödhe. Se om Darhan-Uul-agjan administrativine keskuz.

Istorii

Eländpunktan aluz om pandud vl 1961 kuti sauvondmaterialiden pästandan keskuz i industrijan uz' sijaduz. Pol'šan radnikad abutiba sauda punümbriradajan, savičun i mouckiven tegimid. Darhanan LEK om saudud vl 1966 (48 MVt).

Darhan šingotase raudan metallurgijan tegimel (om saudud vodele 1990) sijaližel torhudel i sömtegimištol: lihakombinat, jauhfabrik, konditerine fabrik, alkogoližiden i alkogolitomiden jomiden kombinat. Lidn om ümbärtud maižanduzrajonal.

Geografijan andmused

Lidn sijadase valdkundan pohjoižes, Transmongoližel raudtel, 665 m ü.m.t. keskmäižel korktusel.

Ühtenzoitase raudtesarakol Šaringol-lidnan hilen kaivuzidenke. Matkad Ulanbatar-pälidnhasai om 188 km suvhe orhal vai 226 km avtotedme.

Klimat om ven kontinentaline kuiv. Voden keskmäine lämuz om +0,9 C° vilun tal'ven tagut, kezakun-elokun +18,3..+20,6 C°, tal'vkun-uhokun −18,0..−23,6 C°. Paneb 284 mm sadegid vodes, enamba pol't kezakus-elokus (52..67 mm kus), kuivaig oleskeleb kül'mkus-sulakus (3..10 mm kus).

Eläjad

Vl 2010 lidnan eläjiden lugu oli 74,738 ristitud, agjan viž kudendest. Kaik 83,883 eläjad oli lidnas vl 2017. Kaikiš suremb lidnan ristitišt om nügüd'.

Valdkundan kahtenz' znamoičendal openduzkeskuz, kümne professionaližen opendusen aluzkundad i maižandusen tedoinstitut ratas lidnas. Mongolijan tedon da tehnologijoiden universitetan (Ulanbatar) üks' kampusoišpäi om avaitud lidnas.