Izmit

Izmit
İzmit
Valdkund	Turkanma
Eläjiden lugu (2022)	376,056 ristitud
Pind	480 km²
Pämez'	Fatma Kaplan Hürrijet; (sulaku 2019—,; Fatma Kaplan Hürriyet)
Telefonkod	+90-(0)262
Aigvö	UTC+3

Izmit (turk.: İzmit [ˈizmit]) om lidn Turkanman lodehes. Se om Kodžaelin agjan administrativižeks keskuseks da palaks.

Istorii

Kaikenaigaižen eländpunktan ezmäižed todištused datiruišoiš 12. voz'sadal EME. Sil aigal territorii oli frigijalaižiden valdas. Möhemba sirdnikad grekižes Megar-lidnaspäi (Megara) sauvoiba Astakos-portlidnut, sijazihe nügüdläižes Bašiksele-rajonas. Frakijan Lisimah-car' mureni lidnut, i letihe Nikomedii-lidnad (grek.: Νικομήδεια) sen sijas. Vll 91−94 EME oli alištunu Riman tobmudele, mülüi Rimalaižhe imperijha. Vl 284 Diokletian-imperator kändi Nikomedijad ühteks pälidnoišpäi (imperijan nellänz' surtte), se jäi znamoičendanke pälidnan sirdandan jäl'ghe Konstantinopolihe.

Vspäi 1337 lidn om turkine kaikenaigašti, nimitusen turkan toižendanke. Ižandusen i transportteiden znamasine keskuz.

Mecanümbriradmine i tekstil'tegimišt (pölvhankanghad, sobad armijan täht, kourad) oliba lidnan ižandusen päsarakoikš eziauguižešti. Nügüd'aigan Izmit šingotase meriportoil i verfil, avtosauvomižel (Ford, Hyundai, Honda, Isuzu) i avtopaloiden tehmižel (šinad), kivivoinümbriradmižel, cementan, alüminijan i bumagan pästandal, sömtegimištol.

Geografijan andmused

Lidn sijadase agjan keskuzpalan suves, Mramorižen meren Izmitan lahten päivnouzmaižel randal, kukhil 200 metrhasai kortte, nell' metrad ü.m.t. keskmäižel korktusel. Om korktoid mägid läz lidnad. Lujad manrehkaidused oleldas, jäl'gmäine znamasine oli vn 1999 elokus.

Matkad Stambulhasai om kahesakümne viž kilometrad päivlaskmha, Ankar-pälidnhasai om 320 km päivnouzmha avtotedme.

Eläjad

Vn 2012 Turkanman rahvahanlugemižen mödhe lidnan eläjiden lugu oli 327,435 ristitud. Kaik 360,409 eläjad oli lidnas vl 2017. Kaikiš suremb lidnan ristitišt om nügüd'. Läz 1,2 mln eläjid om ezilidnoidenke (2022), agjan koume videndest.

Kodžaelin universitet^[1] (turk.: Kocaeli Üniversitesi, 63 tuh. üläopenikoid vl 2024) radab lidnas vspäi 1992.