Jokoham

Jokoham
横浜市
(Jokohama-si)

Lidnanznam	Flag
Valdkund	Japonii
Eläjiden lugu (2018-08-01)	3,731,706 ristitud
Pind	437,49 km²
Pämez'	Fumiko Hajasi (eloku 2009—)
Telefonkod	+81-(0)45
Aigvö	UTC+9

Jokoham, oficialižikš Jokoham-lidn (japonan kelel: 横浜市, vepsän kirjamil: Jokohama-si) om Japonijan kahtenz' surtte lidn Tokion jäl'ghe, valdkundan kaikiš suremb municipaline ühtnik, Kanagav-prefekturan administrativine keskuz.

Jokoham mülüb Suren Tokion lidnaglomeracijha. Lidnan keskuz sijadase 30 km suvipäivlaskmha Tokio-pälidnan keskusespäi, Kanto-rajonas. Kavasaki-lidn erigoitab hoikal jonol Jokoham- da Tokio-lidnoid.

Lidn om Japonijan ižandusen üks' kaikiš surembiš keskusišpäi. Laivansauvomine, biotehnologii, pol'veimiden tehmine oma ižandusen päsarakoikš. Japonijan äjiden korporacijoiden päfaterad sijadase täs, sidä kesken Nissan:an päfater vspäi 2010.

Istorii

Lidnan aluz om pandud vl 1858 peniden kalanikoiden Jokoham- da Kanagav-küliden ühtnendal sauvomha portad läz pälidnad verhanmaižiden laivoiden täht.

Vl 1923 Jokoham oli elänu läbi Suren manrehkaidusen Kantos, 20 tuhad ristituid oli pölištunu, 60 tuhad sauvusid oli muretud. Lidnad udessündutihe vodele 1929.

Geografijan andmused

Jokoham om saudud Tünen valdmeren Tokion lahten päivlaskmaižel randal, sijadase Honšü-saren päivnouzman suves 24 m ü.m.t. keskmäižel korktusel.

Pind om 437,49 km² (vl 2015). Reljef om tazo. Lidn seižub Curumi-jogen da sen ližajogiden randoil.

Klimat om valdmeren subtropine neps. Heinkun da elokun keskmäine lämuz om +25..+27 C°, vilukun da uhokun — +6 C°. Vodenkeskeine lämuz om +16 C°. Paneb sadegid 1690 mm vodes, sidä kesken enamba kezakus, sügüz'kus da redukus (190..230 mm kus). Tal'vkus-uhokus paneb 50..70 mm kus. Voib paneškata lunt vilukus-keväz'kus.

Jokoham jagase 18 administrativižhe lidnanlaptha (japon.: 区 ku). Nak-lidnanlapt om administrativižeks keskuseks.

Transport

Port sijadase lidnas, se om olmas jüguiden täht, otab mail'man nelländehe kümenikha jüguiden vedandan mülün mödhe.

Lidnelektrojonused da metro oma kundaližeks transportaks lidnan südäimes. Vspäi 1972 metro radab lidnas (vl 2014 om 2 jonod, 42 stancijad, 53 km raudted). «Tokaido Sinkansen»-kiruhraudten Uz' Jokoham-stancii sijadase lidnas.

Lähembaine civiline «Tokio Haned» («Tokio rahvahidenkeskeine»)-lendimport (HND) sijadase Tokion kaikiš suvižembas mererandaližes Ota-rajonas. Sišpäi tehtas reisid äjihe verhiže maihe kaiked mail'madme, mugažo Japonijadme.

Lidnan ühthine nägu.

Irdkosketused

• Lidnan ohjastusen oficialine sait (city.yokohama.lg.jp). (jap.) (angl.) (kit.) (kor.) (isp.) (port.)