Mine sisu juurde

Jokoham

Vikipedii-späi
Jokoham
横浜市
(Jokohama-si)
 Lidnanznam
 Flag
Valdkund Japonii
Eläjiden lugu (2023) 3,769,595 ristitud
Pind 437,38 km²
Jokoham 横浜市 (Jokohama-si)
Pämez' Takeharu Jamanaka
(eloku 2021—,
山中 竹春
Jamanaka Takeharu)
Telefonkod +81-(0)45
Aigvö UTC+9


Lidnan rajonad (2010)

Jokoham (japon.: 横浜 [jokohama]), oficialižikš Jokoham-lidn (japonan kelel: 横浜市, vepsän kirjamil: Jokohama-si) om Japonijan kahtenz' surtte lidn Tokion jäl'ghe, valdkundan kaikiš suremb municipaline ühtnik, Kanagav-prefekturan administrativine keskuz.

Jokoham mülüb Suren Tokion lidnaglomeracijha. Lidnan keskuz sijadase 30 km suvipäivlaskmha Tokio-pälidnan keskusespäi, Kanto-rajonas. Kavasaki-lidn erigoitab hoikal jonol Jokoham- da Tokio-lidnoid.

Istorii[vajehta | vajehtada tekst]

Lidnan aluz om pandud vl 1858 peniden kalanikoiden Jokoham- da Kanagav-küliden ühtnendal sauvomha portad läz pälidnad verhanmaižiden laivoiden täht. Vl 1923 Jokoham oli elänu läbi Suren manrehkaidusen Kantos, 20 tuhad ristituid oli pölištunu, 60 tuhad sauvusid oli muretud. Lidnad udessündutihe vodele 1929.

Jokoham om Japonijan ižandusen üks' kaikiš surembiš keskusišpäi. Laivansauvomine, biotehnologii, pol'veimiden tehmine oma ižandusen päsarakoikš. Japonijan äjiden korporacijoiden päfaterad sijadase täs, sidä kesken Nissan:an päfater vspäi 2010, Isuzu, JVCKenwood, Keikyu, Koei Tecmo, Sotetsu, Salesforce Japan, Bank of Yokohama.

Geografijan andmused[vajehta | vajehtada tekst]

Lidn om saudud Tünen valdmeren Tokion lahten päivlaskmaižel randal, sijadase Honšü-saren päivnouzman suves, 24 m ü.m.t. keskmäižel korktusel. Vl 2015 pind oli 437,49 km². Reljef om tazo. Lidn seižub Curumi-jogen da sen ližajogiden randoil.

Klimat om valdmeren subtropine neps. Voden keskmäine lämuz om +16,2 C°, heinkun-elokun +25,6..+27 C°, vilukun-uhokun +6,1..+6,7 C°. Ekstremumad oma −8,2 C° (viluku) i +37,4 C° (heinku, eloku). Kezaaigan minimum om +9,2 C° (kezaku), tal'vaigan maksimum om +24,8 C° (uhoku). Paneb sadegid 1731 mm vodes, enamba kezakus (189 mm) i sügüz'kus-redukus (240..242 mm kus), vähemba tal'vkus-uhokus (65..66 mm kus). Voib paneškata lunt vilukus-keväz'kus, paneb ühesa santimetrad lunt tal'ves keskmäras. Kun keskmäine relätivine nepsuz vajehtase 76..78 % röunoiš kezakus-sügüz'kus i 53..57 % tal'vkus-uhokus.

Tobmuz[vajehta | vajehtada tekst]

Jokoham jagase 18 administrativižeks lidnanlaptaks (japon.: 区 ku). Nak-lidnanlapt om administrativižeks keskuseks.

Edeline lidnan pämez' om Fumiko Hajasi (林 文子, Hajasi Fumiko, eloku 2009 — eloku 2021).

Eläjad[vajehta | vajehtada tekst]

Lidnan ristitišt oli 968 091 eläjad vl 1940. Ületi millionad 1950-nziden voziden augotišes (1 143 687 eläjad vl 1955). Vl 2010 lidnan kaikenaigaižiden eläjiden lugu oli 3 688 773 ristitud. Kaik 3 731 706 eläjad oli lidnas vl 2018. Kaikiš suremb lidnan ristitišt oli 3 777 491 eläjad vl 2020.

Transport[vajehta | vajehtada tekst]

Port sijadase lidnas, se radab jüguiden täht, mülüb mail'man nelländehe kümenikha jüguiden vedandan mödhe.

Elektrojonused da metropoliten oma kundaližeks transportaks lidnan südäimes. Vspäi 1972 metro radab lidnas (vl 2014 om kaks' jonod, 42 stancijad, 53 km raudted). «Tokaido Sinkansen»-kiruhraudten Uz' Jokoham-stancii sijadase lidnas.

Lähembaine civiline Tokio Haned-lendimport (vai Tokio rahvahidenkeskeine, HND) sijadase Tokion kaikiš suvižembas mererandaližes Ota-rajonas. Sišpäi tehtas reisid äjihe verhiže maihe kaiked mail'madme, mugažo Japonijadme.

Lidnan ühthine nägu (2015)

Homaičendad[vajehta | vajehtada tekst]


Irdkosketused[vajehta | vajehtada tekst]