Namangan

**Namangan**
Valdkund	Uzbekistan
Eläjiden lugu (2025)	766,000 ristitud
Pind	145 km²
Pämez'	Anvaržon Otahodžaev; (tal'vku 2023—)
Telefonkod	+998−6922
Aigvö	UTC+5

Namangan (mugažo uzbekan kelel, vai kirillical Наманга́н) om lidn Uzbekistanan suvipäivnouzmas. Se om valdkundan koumanz' lidn eläjiden lugun mödhe, Namanganan agjan administrativine keskuz (vspäi 1941) da pala.

Istorii

Nügüdläine eländpunkt mainitaškanzihe 15. voz'sadan lopuspäi. Se sai lidnan statusad vl 1610. Aksikent-lidnan eläjad (alusenpanend 3.-2. voz'sadad EME, sijazihe Ferganan alangišton keskuses) sirdiba Namanganha vn 1620 manrehkaidusen jäl'ghe, kudamb pani amušt lidnad mantazole täuzin. Kändihe provincijan (vilojatan) keskuseks 18. voz'sadan keskes. Vl 1912 raudte ühtenzoiti lidnad Kokandanke. Vl 1926 lidn eli lujas manrehkaiduses läbi.

Namangan šingotase sömtegimištol, puvillan ümbriradmižel i torguindal. Nevondkundaližen aigan jüged tegimišt radoi mugažo.

Geografijan andmused

Lidn sijadase agjan päivnouzmas, Ferganan alangišton pohjoižes, 476 m ü.m.t. keskmäižel korktusel.

Matkad Kirgizstanhasai om kaks'kümne kilometrad lodeheze vai pohjoižpäivnouzmha orhal, Taškent-pälidnhasai om 200 km lodeheze orhal vai 300 km avtotedme.

Eläjad

Vl 2011 lidnan eläjiden lugu oli 451 tuhad ristituid. Edel 2016. vot lidnan pind oli 101,5 nellikkilometrad, sid' mülütihe ezilidnoid, i ristitišt ližadui läz 90 tuhad eläjid. Kaik 597,400 eläjad oli lidnas vl 2017. Kaikiš suremb lidnan ristitišt om nügüd'.

Uzbekad ottas 95,9 % ristitištos (2011).

Islaman 270 pühäpertid (vn 1997 andmused) i hristanuskondan koume jumalanpertid oma avaitud lidnas.

Nened professionaližen opendusen aluzkundad ratas lidnas: Namanganan valdkundaline universitet (vspäi 1942, 5,4 tuhad üläopenikoid vl 2017), pedagogine institut, inženeriž-tehnologine institut, kümne kolledžad.

Transport

Avtobusad, maršruttaksid i taksid oma kundaližeks transportaks lidnas. Vll 1973−2010 trolleibusverk radoi. Namangan-raudtestancii radab lidnan keskuses.

Namanganan rahvahidenkeskeine civiline lendimport (uzb.: Namangan xalqaro aeroporti, NMA / НМГ / UTFN, 760 tuh. passažiroid vl 2024) sijadase kaks'toštkümnes kilometras keskusespäi lidnan päivlaskmaiženno röunanno. Tehtas reisid Taškentha i Venäman järedoihe lidnoihe.