Ostrav

Ostrav
Ostrava

Lidnanznam	Flag
Valdkund	Čehanma
Eläjiden lugu (2024)	284,765 ristitud
Pind	214,23 km²
Pämez'	Jan Dohnal (sulaku 2023—, Jan Dohnal)
Telefonkod	+420
Avtokod	T
Aigvö	tal'vel UTC+1, kezal UTC+2

Lidnan kart (2014)

Ostrav (čeh.: Ostrava [ˈɔstrava], silez.: Uostrawa, pol'š.: Ostrawa, saks.: Ostrau) om Čehanman koumanz' surtte lidn eläjiden lugun mödhe. Se om Moravijan da Silezijan randan administrativine keskuz, sijadase valdkundan i randan päivnouzmas.

Istorii

Eländpunktan aluz om pandud vl 1267. Löutihe korgedladušt kivihil't vl 1763, i 20. voz'sadal lidn oli sen samižen da raudan metallurgijan järedaks keskuseks.

Vl 1994 hilen samine om seižutadud, no koksan i terasen tegimed jätktas radod. 2000-nzil vozil metallurgijan tegimed oma mödud verazmaižile kompanijoile (ArcelorMittal da tž.).

Geografijan andmused

Lidn sijadase Oder-jogen randal, 195..339 m korktusil, keskuzpala om 215 m ü.m.t. keskmäižel korktusel. Koume tošt joged om lidnas: Opav (Opava 111 km pitte) lankteb Oderha huralpäi, Ostravice (64 km pitte) oiktalpäi, Lučin (Lučina 37 km pitte) jokseb Ostravicen ližajogeks. Matkad Praghasai om 370 km päivlaskmha, Pol'šanman röunhasai — 15 km pohjoižhe, Slovakijahasai om 55 km suvipäivnouzmha.

Klimat om ven kontinentaline, valdmeren valatoitusenke. Keza om päivoikaz, tal'vaig om pil'vekaz lujas. Voden keskmäine lämuz om +9,6 C°, kezakun-elokun +18,1..+19,9 C°, tal'vkun-uhokun −0,6...+0,7 C°. Ekstremumad oma −29,7 C° (viluku, tal'vku) i +36,9 C° (heinku, uhoku). Kezaaigan minimum om +1,1 C° (kezaku), tal'vaigan maksimum om +17,3 C° (uhoku). Ei voi panda halad kezakus-elokus. Paneb sadegid 673 mm vodes, enamba semendkus-heinkus (84..96 mm kus), vähemba tal'vkus-keväz'kus (26..34 mm kus). Paneb lunt 93 sm tal'ves. Kun keskmäine relätivine nepsuz vajehtase 71..74 % röunoiš sulakus-elokus, 78..84 % sügüz'kus-uhokus.

Tobmuz

Lidnan rajonad (2007)

Vspäi 1990 lidn jagase nimitadud rajonikš ičeohjastusenke (äilugu čeh.: obvody), niid om 23 vspäi 1994.

Edeline lidnan pämez' (čeh.: primátor města Ostrava) om Tomaš Macura (Tomáš Macura, kül'mku 2014 — sulaku 2023).

Eläjad

Vn 2011 Čehanman rahvahanlugemižen mödhe lidnan eläjiden lugu oli 296 224 ristitud, vn 2021 — 282 450 ristitud. Kaikiš suremb lidnan ristitišt oli 327 371 eläjad vl 1991. Lidn om Čehanman kahtenden surtte aglomeracijan keskuz, 1,15 mln eläjid (2004).

Kaik koume universitetad ratas lidnas: Kaivuzmetallurgine üläškol — Ostravan tehnine universitet (10 tuh. üläopenikoid vl 2020, alusenpanend 1849), Ostravan universitet, Ostravan biznesškol.

Irdkosketused

• Lidnan oficialine sait (ostrava.cz). (angl.) (čeh.)