Paisandu

Paisandu
Paysandú
Lidnanznam;	Flag;
Valdkund	Urugvai
Eläjiden lugu (2023)	81,550 ristitud
Pind	21,8 km²
Telefonkod	+598−472-xx-xxx
Aigvö	UTC−3

Paisandu (isp.: Paysandú [pai̯.sanˈdu]) om lidn Urugvain päivlaskmas, valdkundröunanno. Se om valdkundan nellänz' lidn eläjiden lugun mödhe, Paisandun agjan (departamentan) administrativižeks keskuseks da palaks.

Istorii

Eländpunktan aluz om pandud vl 1772 kuti lidnut (isp.: villa). Se sai todesižen lidnan statusad (isp. ciudad) vn 1863 8. päiväl kezakud.

Paisandu-lidn šingotase sömtegimištol (olud, sahar, citruskazmusiden ümbriradmine), cementantegimel, mecan ümbriradmižel, villkanghiden tehmižel, nahkedheotandoil i lebuturizmal.

Geografijan andmused

Lidnan sijaduz agjas i valdkundas vn 2005 kartal

Lidn sijadase agjan suvipäivlaskmas, Urugvai-jogen hural randal, 34 m ü.m.t. keskmäižel korktusel.

Matkad Montevideohosai om 378 km suvipäivlaskmha. Vspäi 1975 avtotesild Artigas-jenaralan nimed 334 m pitte ühtenzoitab Argentinan Kolon-lidnanke Urugvai-jogen vastrandal.

Klimat om subtropine neps. Keza om päivoikaz, tal'vaig om pil'vekaz. Voden keskmäine lämuz om +18,6 C°, kezakun-elokun +12,0..+13,9 C°, tal'vkun-uhokun +23,7..+25,1 C°. Ekstremumad oma −7,4 C° (kezaku) i +44,0 C° (viluku). Ei voi panda halad redukus-sulakus (redukun i sulakun minimum om 0 C°). Paneb sadegid 1292 mm vodes, enamba tal'vkus-uhokus (132..141 mm kus) i sulakus (154 mm), vähemba kezakus-sügüz'kus (55..79 mm kus). Kun keskmäine relätivine nepsuz vajehtase 75..78 % röunoiš sulakus-kezakus, 62..67 % kül'mkus-uhokus, 70..74 % toižiš kuiš.

Eläjad

Vn 2011 Urugvain rahvahanlugemižen mödhe lidnan eläjiden lugu oli 76 412 ristitud (agjan kaks' koumandest), ezilidnoidenke 90 tuhad ristituid. Se om kaikiš suremb lidnan ristitišt, läz kaikenaigaine vspäi 1996 (sil vodel oli 74 568 eläjad).

Vspäi 1969 Paisandun universitetine keskuz radab lidnas, se alištub Tazovaldkundan universitetale.

Galerei

Lidnan tobmuden sauvuz (Palacio de la Intendencia Municipal de Paysandú, 2011)
Lidnan bazilikjumalanpert', vn 2011 nägu
Paisandun pedagogižen opendusen institut vl 2017 (Instituto de Formación Docente de Paysandú)
Teatr Florensio Sančes-dramaturgan nimed (2013)
Lidnan kul'turkeskuz (vn 2017 olend)
Paisandu-päraudtestancii vn 2011 keväz'kus

Irdkosketused

Paisandu Vikiaitas