Ratnapur

Ratnapur
රත්නපුර (singal.)
இரத்தினபுரி (tamil.)
Valdkund	Šrilank
Eläjiden lugu (2022)	165,998 ristitud
Pind	20 km²
Telefonkod	+94−45
Aigvö	UTC+5:30

Ratnapur (singal.: රත්නපුර Ratnapura [rət̪n̪əpurə], tamil.: இரத்தினபுரி Ratnapuri [iɾɐt̪ːinɐβuɾi], angl.: Ratnapura, «kalližarvoižiden kividen lidn» sanskritaspäi) om lidn Šrilankan suvipäivlaskmas. Se om Sabaragamuv-agjan administrativine keskuz da pala. Ratnapuran ümbrikon keskuz mugažo, ümbrik om agjan ühteks kahtespäi.

Istorii

Läz kaht tuhad vozid tagaz ezmäižed buddizman manahad tuliba lidnan tahoiže Indijan pohjoižiš agjoišpäi. Sadas kalližarvoižid kivid läz lidnad keskaigaspäi (rubinad, sapfirad da tž.).

Ratnapur šingotase turizmal, löutud kividen torguindan keskuseks i transporttesol'meks. Kalližarvoižiden kividen i grafitan samine tegese lidnan ümbrištos.

Geografijan andmused

Lidn sijadase ümbrikon lodehes, agjan keskuzpalas, Kalu-jogen oiktal randal tobjimalaz (singal.: කළු ගඟ Kalu Ganga «must jogi» 129 km pitte), 130 m ü.m.t. keskmäižel korktusel, čajun da gevejan (londuseline räzin) plantacijoiden keskes.

Matkad ekonomižhe Kolombo-pälidnhasai om üks' sada kilometrad lodeheze avtotel vai raudtel.

Klimat om ekvatorialine neps (tropine vihmmecoiden), sur'veded oma paksud. Kun keskmäine lämuz om +26,9..+28,5 C° röunoiš voden aigan. Ekstremumad oma +16,6 C° (tal'vku, uhoku) i +38,7 C° (keväz'ku). Il'man lämuz voib ületada +34 C° miččel taht kul, ei voi olda madalamb mi +20 C° sulakus-redukus. Paneb sadegid 3688 mm vodes, enamba semendkus i redukus (467 mm kus), vähemba vilukus-uhokus (125..137 mm kus).

Eläjad

Vl 1901 lidnan ristitišt oli 4,084 eläjad. Vl 2011 lidnan eläjiden lugu oli 52,170 ristitud, vl 2022 — 165,998 ristitud.

Religijan mödhe (2012): buddistad — 78,2 %, induistad — 14,1 %, islamanuskojad — 5,3 %, riman katolikad — 1,5 %, toižed hristanuskojad — 1,0 %.

Kaik viž kolledžad ratas lidnas.

Galerei

Buddizman Saman-jumalan pühäpert' (Maha Saman Devalaya), nägu vn 2016 heinkus
Phh. Pedran da Paulan päjumalanpert' (katoline), vn 2016 heinkun nägu
Nacionaline Kalližarvoižiden kividen da juvelirtegesiden ohjanduz vl 2016 (National Gem & Jewellery Authority)
Lidnan kirjišt (vn 2016 olend)

Irdkosketused

Lidnan oficialine sait (ratnapura.mc.gov.lk). (angl.) (singal.) (tamil.)

Ratnapur Vikiaitas