Sanderlend (Anglii)

Sanderlend
Sunderland
	Lidnanznam;
Valdkund	Sur' Britanii
Eläjiden lugu (2021)	168,315 ristitud
Telefonkod	+44-(0)191
Aigvö	tal'vel UTC+0,; kezal UTC+1

Sil sanal voib olda toižid znamoičendoid; miše nähta niid, tulgat tänna.

Sanderlend (angl.: Sunderland [ˈsʌndərlənd], sijaline virkand: [ˈsʊndlən]) om Suren Britanijan lidn da järed meriport (kahtenz' surtte municipaline port kunigahuses), mülüb Tain da Uir-grafkundha.

Istorii

Eländpunktad oliba olmas lidnan sijas neolitan aigaspäi, sidä kesken Amuižes Rimas. 12. voz'sadan kalanikoiden pen' külä kändihe laivansauvojiden žiloks 14. voz'sadale. Se voi sada nügüdläšt nimed vanhan anglijan kelen sundorlande-sanaspäi (nüg. angl.: separate land «erigoittud tahond») — erigoittud geografižil objektoil (jogil da ojil) vai alištadud konkretižele jumalankodile. Nügüd'aigaine lidn formiruihe kuti port läz kivihilen kaivusid.

Avtosauvomižen šingotez (vspäi 1986, Nissan-kompanijan tegimed, 500 tuh. avtoid vl 2012) jäti lidnad henghe laivansauvomižen lopindan jäl'ghe (1988) da kivihilen kaivusiden sauptandan jäl'ghe (1994).

Geografijan andmused

Lidn otab grafkundan suvipäivnouzmad, sen administrativižen Siti-of-Sanderlend-rajonan päivnouzmad. Sanderlend sijadase Anglijan pohjoižpäivnouzmas, mererandaližiden kukhiden jonol, 60..80 m ü.m.t. keskmäižel korktusel. Se seižub Uir-jogensun molembil randoil, Pohjoižmeren randištol.

Matkad Londonhasai om 387 km suvhe-suvipäivnouzmha. Lähembaižed järedad lidnad om Njukasl-apon-Tain ani lodehližen röunan taga i Saut-Šilds ani pohjoižen röunan taga.

Klimat om venon vönen valdmeren, neps, tulleikaz, pil'vekaz (tal'vaigan lujas) da sumosine. Paneb sadegid 597 mm vodes, läz tazomäras kuidme, enamba elokus (60 mm) i kül'mkus (63 mm), vähemba uhokus (38 mm).

Eläjad

Lidnan i sen boron ristitišt poleneb vitkos. Vl 2021 lidnan ristitišt oli 168,277 eläjad, alištunuzidenke ezilidnoidenke (angl.: metropolitan borough 137 km² pindal) — 274,200 eläjad. Vn 2011 Suren Britanijan rahvahanlugemižen mödhe lidnan eläjiden lugu oli 174,286 ristitud, alištunuzidenke ezilidnoidenke — 275,506 ristitud. Vn 2001 rahvahanlugemižen mödhe ristitišt oli 182,758 eläjad lidnas i 280,807 eläjad susedkundoidenke.

Lidnan eläjad nimitasoiš makemalaižikš (angl.: Mackem, Makem vai Mak'em).

Religijan mödhe (2011): hristanuskojad — 70,2 %, islamanuskojad — 1,32 %, sikhad — 0,29 %, induistad — 0,22 %, buddizman polenpidajad — 0,19 %, judaistad — 0,02 %, religijatomad — 21,90 %.

Galerei

Lidnan tobmuden uz' sauvuz (City Hall) vn 2021 keväz'kus läz vaumičendad. Enzne Civic Centre (lidnan tobmuden pert' vll 1970−2021) oli pandud mantazole vl 2022
Nissan Motor Manufacturing UK Ltd-kompanijan avtotegim vl 2007
Sanderlendan universitetan ph. Petran kampus (2015)
Sanderlendan muzei i Tal'veližed sadud vn 2002 semendkus
Vauktusen stadion i vezisportan keskuz (stadionan huralpäi) lidnan keskuzpalas (eloku 2023)
Sanderlend-päraudtestancijan i metrostancijan tulend vl 2024. Stancijad sijadasoiš manalaižes

Irdkosketused

Lidnan tobmuden sait (sunderland.gov.uk). (angl.)

Sanderlend (Anglii) Vikiaitas