Teberd

Teberd
Теберда (ven.)
Къабардеа / Теберда (kab. da čerk.)
Теберди (kar. da balk.)
Valdkund	Venäma
Eläjiden lugu (2022)	8,667 ristitud
Pind	8,57 km²
Pämez'	Rasul Hubiev; (viluku 2021—)
Telefonkod	+7−87 872-xx-xxx
Avtokod	09
Aigvö	UTC+3 (MSK+0)

Teberd (ven.: Теберда́, kab. da čerk.: Къабардеа vai Теберда, kar. da balk.: Теберди́) om Venäman lidn-kurort Karačajan da Čerkesijan Tazovaldkundan suves. Se mülüb Karačajevskan lidnümbrikho.

Istorii

Eländpunktan aluz om pandud vl 1868 kuti Baičoralani-külä (kar. da balk.: Байчораланы-Къабакъ) ezmäižen rodun kanzannimen mödhe. Aigan mändes ristitud toižel rodul tulihe elämha, i udesnimitihe küläd nügüdläižikš lähižen jogen mödhe. Vl 1971 žilo sai lidnan statusad.

Teberd šingotase kurortan edheotandoil vspäi 1925 (turbazad, tuberkulözanvastaine^[1] da toižed sanatorijad, adivpertid, lebukodid), kalankazvatusel i turizmal.

Geografijan andmused

Lidn sijadase ümbärdajan rajonan suvipalan lodehes, Teberd-jogen randoil (60 km pitte, Kubanin hura ližajogi), Suren Kavkazan pautkil, 1280 m ü.m.t. keskmäižel korktusel, Teberdan kel'dtahon^[2] territorijal. Paks poud da puhtaz il'm mägilpäi abutihe käta lidnad lebutahoks.

Matkad Karačajevskhasai (lähembaine lidn) om koumekümne ühesa kilometrad pohjoižhe orhal vai 44 km avtotedme, Čerkesskhasai om 105 km pohjoižhe.

Tobmuz

Sijaližen Adminstracijan edeline pämez' om Aslan Kanamatov (kül'mku 2017 — tal'vku 2020).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 9 058 ristitud, lidnümbrikon videndez. Vl 2018 lidnan ristitišt oli 8 670 eläjad. Kaikiš suremb lidnan ristitišt oli 9 100 eläjad vl 2011.

Rahvahad (enamba 1 % vl 2010): karačailaižed — 69,1 %, venälaižed — 25,1 %, osetinalaižed — 1,1 %, toižed rahvahad — 4,7 %.

Islaman pühäpert' om avaitud vspäi 2008.

Lapsiden opendusen aluzkundad oma päivkodid, keskškol, muzikškol. Professionaližen opendusen aluzkundad ratas lähembaižiš lidnoiš.